Bermejo: "Pedir o 2% do PIB non é utopía"

22.04.2010 Pilar Bermejo considera que cinco membros no goberno "é abondo" e pon como exemplos Cambridge ou Oxford

Currently 5.00/5
1
2
3
4
5

5.0/5 [3 Voto/s]

0
Tweet

M.J.CEBRO . SANTIAGO

Pilar Bermejo, catedrática que Química analítica e candidata a reitora
FOTO: FERNANDO BLANCO

A candidata ó reitorado da USC Pilar Bermejo respondeu onte as cuestións que lle formularon os internautas no chat que organiza o Grupo Correo Gallego.

A catedrática de Química Analítica volveu teimar na necesidade de reclamar un financiamento para o Sistema Universitario Galego do 2% do PIB, algo que "non é utópico. Moitas universidades españolas teñen en torno a 1,5% e nós non chegamos ó 1%. O obxectivo a escala europea é o 3%. Polo tanto, se queremos unha universidade de calidade e de futuro cómpre a implicación do Goberno e nós saberemos xustificar detalladamente o que facemos co financiamento que recibimos".

Con só cinco persoas, o seu equipo é o máis reducido dos ata agora desvelados por parte dos sete competidores para a cadeira de San Xerome. Bermejo considérao"suficiente" para gobernar a USC, que agora conta con nove vicerreitorados e tres adxuntos, ademais da secretaría xeral. "Universidades prestixiosas como Cambridge, Oxford, Stanford ou Berkelei teñen equipos de goberno dun tamaño similar. Pensamos que é preciso traballar en equipos reducidos". Foi a resposta a quen suxería que o motivo de tan reducido equipo é buscar futuros pactos de cara a unha segunda volta, posibilidade que Bermejo foi a única que recoñeceu claramente que tiña na súa cabeza. Neste terreo, outro internauta pediulle que aclarase diferenzas entre o seu proxecto e o de Lourenzo Fernández Prieto. "A nosa candidatura conta co apoio de todas aquelas persoas da comunidade que queren un cambio profundo nas formas de goberno desta universidade", replicou.

Ó preguntarlle sobre se a "terceira misión da univesidade" era un fin para "crear empresas" Bermejo salientou a necesidade da tansmisión do coñecemento á sociedade, pero "en ningún caso isto pode desvirtuar as dúas funcións básicas, o profesorado debe ter clara a súa misión docente e investigadora, non empresarial". E afeou ese "30% de persoal Docente e Investigador que non realiza ningunha actividade investigadora". Fixo autocrítica -"probablemente a USC ten unha parte importante de culpa por non darlle os medios adecuados"- e para incentivalos, proporá "novas liñas e grupos de investigación".

Ademais, explicitou a súa aposta "pola avaliación da actividade docente do profesorado. Todo o persoal da universidade ten que cumprir coa súa obriga e se non haberá que tomar as medidas oportunas, xa que somos unha institución pública e temos que ser moi coidadosos co que facemos co diñeiro que a sociedade nos achega".

Para Bermejo, a concorrencia de 7 candidatos "pon de manifesto que na USC hai un grave problema debido ós gobernos dos últimos anos. Por iso presentamos a nosa candidatura".

Axenda

Hoxe, xoves 22

(11:00 h.)

Juan Varela Durán

Mañá venres 23

(18:00h)

Laura Sánchez Piñón

"Lugo non é de segunda"

A realidade bicampus centrou a pregunta dun estudante lucense, que rexeita que "só se lembran deles en eleccións". "Somos conscientes de que moitas persoas do Campus de Lugo se senten como de segunda e queremos romper con esa situación. Apostamos por que todos os nosos vicerreitores sexan de toda a universidade e todos se preocupen de Lugo. Cómpre apostar por este campus facendo políticas que apoien a investigación, sobre todo naqueles centros que están sendo usados como paso". Ademais, criticou a exclusión da Facultade de Veterinaria do proxecto Campus Vida, "como a doutros moitos grupos".

Investigar sen precariedade

Os plans de estabilización dos investigadores Ramón y Cajal e Parga Pondal volveron suscitar interese, como nos outros chats. "Non se pode consentir que os departamentose soliciten novas prazas nestes programas e que despois non os queiran estabilizar", salientou Bermejo, que considerou "urxente" solucionar "o problema" de existencia dun alto número de persoal contratado a cargo de proxectos de investigación e bolseiros. "Osgrupos cos que traballa este persoal ás veces non teñen un financiamento estable, pero temos que ver as medidas legais que podemos usar para resolvelo. Non é de recibo facer unha investigación punteira con persoal con contratos precarios", engadiu.