Casares esixe ter en conta o patrimonio no financiamento

O reitor electo da Universidade de Santiago de Compostela (SC), Juan Casares Long, reivindicou hoxe un "recoñecemento no plano do financiamento" da institución como "principal centro de investigación de Galicia" e, sobre todo, ante as necesidades de "mantemento" de 25 edificios do campus compostelán que contan, "algúns", con "centos de anos" de antigüdade.

"Os nosos edificios son, algúns, edificios de centos de anos, outros de moitos anos, que necesitan un tratamento especial no que se refire a infraestruturas. Son edificios catalogados, de moito valor histórico, que teñen que recibir unha axuda importante para o seu mantemento", recalcou.

Casares desprazouse onte a Lugo para reunirse co rexedor municipal, Xosé López Orozco, no marco dunha roda de encontros, que manterá tamén co alcalde de Santiago, Xosé Sánchez Bugallo, e co presidente da Xunta, Alberto Núñez Feijóo, para a que aínda non hai data. O reitor electo, que tomará posesión o 25 de xuño, está convencido de que "o sistema universitario galego necesita unha atención" e que "os propietarios da universidade", que é "a sociedade", sexa consciente do "servizo esencial" que presta o sistema universitario galego.

Previamente, o alcalde de Lugo, Xosé López Orozco, agradeceu a súa visita á vez que asumiu o compromiso do concello de "colaborar sempre coa Universidade de Santiago e co campus de Lugo". "Ademais de ser a cidade do sacramento e da muralla, esta é unha cidade universitaria, daquela fariamos un gran traballo", sinalou o rexedor municipal.

O catedrático de Enxeñería química foi elixido para relevar a Senén Barro o pasado 24 de maio en segunda roda, ó acadar o 56,9% dos votos fronte a Lourenzo Fernández Prieto