Casares Long acepta a invitación a debater, pero só dous encontros

O catedrático de Enxeñería Química e primeiro clasificado na primeira volta das eleccións ó reitorado da USC respondeu onte afirmativamente á invitación que lle fixera o seu contrincante Lourenzo Fernández Prieto a debater as súas respectivas ideas acerca do futuro da institución.

Casares Long amosou onte a súa "total conformidade" coa idea dos debates, mais a súa proposición é a da realización de dous encontros e non tres - como era a idea de Prieto- un no campus compostelán e outro no lucense, o primeiro o vinceiro mércores 19 de maio en Lugo e o segundo o xoves 20 en Compostela.

Pouco despois, o his­toriador aceptaba a proposta, aínda que lamentando que "polo que parece o campus norte vaia quedar sen debate", interpretando que o enxeñeiro preferiría debater no sur. Con todo, acepta o formato de Casares, pero "confía en que cambie de idea e acepte debater tamén no campus norte" .

Fernández Prieto propuxéralle ó seu contrincante que se celebre un encontro en cada un dos campus: os dous de Santia­go e o de Lugo. Apelando á cur­ta duración da campaña da segunda volta, o seu rival é parti­dario de que en Santiago haxa un único encontro.

A concreción destes encon­tros puxo en evidencia que, unha vez reducida a batalla elec­toral a cousa de dous (en primeira volta o pasado mércores houbo sete candidatos) a campaña irá subindo de ton. Hai dous días Casares pedíalle en Radio Obradoiro ó seu rival "tran­quilidade" ao redor deste asunto, molesto por que os propuxera a través dos medios xa na noite electoral, antes de facelo por escrito, e relacionándoo co ímpeto da mocidade do seu rival.

Onte Fernández Prieto mostra­ba a súa sorpresa por estas palabras. "Estou sorprendido. Non espera­ba estas declaracións dunha per­soa coa elegancia e co talante que adoita amosar o profesor Casares. Se o dixo porque levo unha equi­pa nova, con ideas frescas e vita­lidade, declárome culpable", dixo.

Casares referiuse tamén ás palabras do deputado do BNG Carlos Aymerich, que pensa que a USC "terá que escoller entre unha opción que conta coa simpatía da Xunta e outra, a representada por Fernández Prieto, que é unha opción progresista, comprometida cun sistema universitario galego".

Pola súa parte Casares teimaba onte "O meu parti­do é a universidade. Somos unha candidatura na que todos teñen cabida", replicou".