"Os comités atópanse secuestrados pola UMG"

Parte do grupo de estudantes que abandonaron os Comités o pasado 26 de febreiro FOTO: AXENCIAS

Denunciárono o mesmo día que deixaron as filas: "Os Comités atópanse hoxe secuestrados por unha minoría que non dubidou, co fin de manter o seu control total sobre a organización, en levar a cabo todo tipo de prácticas ilexítimas e mesmo ilegais". Cento sesenta e cinco membros da organización estudantil, alumnos das tres universidades galegas, presentaron a súa renuncia o pasado 26 de febreiro durante a celebración da última Asemblea Nacional. A razón? O bando escindido achácaa ao excesivo control da Unión da Mocidade Galega, a UMG, -organización xuvenil da UPG, dentro do Bloque-, que foi gañando poder interno. "Somos xente que participamos no movemento estudantil desde hai anos e que vimos como nos últimos meses se foi perdendo toda democracia interna, levándoo a extremos de auténtico verticalismo, imposición e sectarismo por parte desa corrente, ao modo do que está a acontecer noutras organizacións do nacionalismo", aseguran en conversa con este xornal os renunciantes, que o vindeiro 26 de marzo inician nova andaina. Será mediante a convocatoria dunha Asemblea Nacional Constituínte da nova organización do estudantado galego.

"Queremos escapar de ser brazo de transmisión de ninguén e escapar das loitas que se producen dentro do nacionalismo", din. Aínda que se pronuncian como de esquerda transformadora e soberanista, que buscan un ensino público galego, de calidade e antipatriarcal. "Somos nacionalistas, pero cada un podemos ter unha adscrición diferente, como defecto acontece, e, desde logo, queremos evitar sectarismos, dirixismos, unha organización moito máis horizontal, con vocación de agrupar todos os estudantes da Galiza, de que as decisións sexan aprobadas polas asembleas de todos os centros do país e que non sexan unhas decisións importas por partidos que poidan ter o control dos órganos de dirección".

A organización, fundada baixo ese epígrade en maio de 2008, froito da unión dos Comités Abertos da Facultade (CAF) e dos Comités Abertos de Estudantes (CAE), leva algún tempo sendo diana de dardos críticos, internos e externos, que a acusan de excluínte e antidemocrática. "Os CAF respeitaban as canles democráticas internas, aínda que nas últimas etapas comezou a haber un control externo e unha fiscalización por parte do UMG", relatan as fontes do novo momevemento estudantil que prefiren non dar nomes "para evitar personalismos e porque aínda non estamos constituídos". No seu entender, responde a unha dinámica instaurada no BNG, transmitida á organización afín pola lóxica do contaxio. "Na asemblea constituínte dos Comités a voz crítica era moi pouca. Pero co paso do tempo foi in crescendo. No campus de Lugo marchou todo o mundo dos Comités e no de Compostela foron moi numerosos. O da Coruña, pola contra é o que menos xente ten polo momento". E engadeo que considera unhha vantaxe: "Da xente escindida en Santiago nós nacemos xa con nove claustrais mentres os Comités quedan en sete, claro que iso non se dá na Coruña". Aínda así, queren deixar claro que non xorden "para ir contra ninguén, senón para traballar e facer cousas fóra dunha dinámica insostíbel no que se paralizou a actuación externa polas confrontacións internas".

"Como estudantes comprometidos e comprometidas cun sistema educativo galego propio, público e de calidade; co futuro do noso país e cun proxecto nacionalista amplo que ten nesta organización o seu referente estudantil, debemos denunciar ante o conxunto dos e das asistentes a esta Asemblea Nacional a situación que levou os Comités a unha situación de división interna sen precedentes e parálise organizativa.