O equipo de Fernández Prieto, alén da política

Fernández Prieto, onte, durante a charla cos internautas FOTO: Antonio Hernández

A USC está inmersa, desde hoxe, na segunda volta da carreira electoral á cadeira de reitor da universidade compostelá, que se decidirá o día 24. Lourenzo Fernández Prieto, que se mide con Juan Casares Long nesta quenda, foi entrevistado onte, vía dixital, polos internautas do Grupo Correo Galego e entre as súas máis de 40 respostas quixo deixar claro que a súa aposta é allea á politización, que os pactos son "cousa do pasado" e que defende, como modelo ideal, o de Cambridge.

Un bo número dos "ciberxornalistas improvisados", ante os que defendeu con orgullo ser "galeguista e nacionalista", achegaron as súas preguntas en clave moi política, incidindo na súa vinculación co BNG e o apoio que pediron para el a nacionalistas e progresista os deputados Carlos Aymerich (Bloque) e Xoaquín Leiceaga (PSdeG). A xuízo do reitorable, as súas palabras non supoñen inxerencia ningunha na autonomía universitaria nin un intento de politizala, senón un bo síntoma.

"Que se preocupen pola USC os responsables políticos e sociais é moi positivo. E no meu Facebook verá que outros deputados tamén me manifestaron a súa simpatía sen ser sequera vellos amigos nin profesores como Leiceaga e Aymerich. Espero que os meus amigos do PP tamén o fagan público. A politización da universidade é máis intensa canto máis se oculta. Eu non agocho nada, outros si", respondeu. De aí que formase o seu equipo sen valorar filias políticas. "Non mirei o carné de ninguén. Tampouco sei que relixión profesan", engadiu á pregunta de cantos militantes do BNG ten ao seu redor. "O equipo que ten cargos orgánicos partidarios entre os seus membros non é o meu", engadiu en referencia aos nomes da lista do seu adversario.

Precisamente, algúns dos internautas buscaron a súa opinión sobre a orientación política de Casares. A estes aclaroulles que non considera que o programa do seu rival responda os principios da dereita porque non cre que "os principios convencionais da política se poidan aplicar á universidade", pero considerou que a súa proposta é "regresiva". "Ser de dereitas é moi respectable (...). Conservador é o seu programa, non el", salientou.

Finalmente, e respecto de como acadará os recursos necesarios para levar o seu programa á realidade, apuntou varias vías para garantir a sustentabilidade financeira: "Gastar mellor e máis eficazmente e lograr máis recursos de todas as intancias e en todos os xacementos posibles, de San Caetano a Bruxelas".