Haberá Campus do Mar pase o que pase, di Gago

O presidente dos armadores de Vigo, Touza, e o reitor Gago, pola esquerda FOTO: AXENCIAS

O proxecto Campus do Mar da Universidade de Vigo segue sumando apoios. Onte foron a Cooperativa de Armadores de Vigo e as principais asociacións de armadores e buques de pesca e as organizacións de produtores as que que materializaron o seu entusiasmo co proxecto a través da sinatura dun acordo de colaboración. Este apoio será, segundo a valoración do reitor Alberto Gago, "a peza distintiva" con respecto ao resto de proxectos que competirán con Vigo por acadar o selo de Excelencia en ciencia e tecnoloxía mariña, en referencia aos proxectos que se presentarán nas Palmas e Cádiz. "Se vemos detrás de cada unha das propostas que nos imos presentar a esta convocatoria descubrimos unha enorme diferenza con respecto aos sectores produtivos que apoian a cada unha" en referencia á gran baza que supón para Vigo, non só dispor dunha localización privilexiada, como é a Antiga Escola de Transmisión e Electrónica da Armada, ETEA, senón tamén contar co dos tres sectores fundamentais neste ámbito: a pesca, a acuicultura e o naval.

Gago subliñou que "seguimos coas mesmas posibilidades e rivais de sempre", se ben anunciou tamén novidades, algunha de importante calado, como o feito de que "a Universidade de Vigo en exclusiva achegaría ao proxecto arredor de 500 doutores en ciencia e tecnoloxía mariña", unha cifra que chegaría a entre 1.200 ou 1.500 contanto os que se sumen ó proxecto desde as outras dúas galegas e as tres do Norte de Portugal.

A fortaleza que está a adquirir o proxecto, sobre todo tras o apoio da Xunta coa cesión dos terreos da ETEA, motivou tamén que o reitor insistise en que haberá Campus do Mar, alén da competición do Ministerio de Educación. "Pode custar máis tempo porque haberá menos financiamento pero a nosa vontade é que haxa Campus do Mar cos socios que temos", subliñou Gago. "O proxecto sairá adiante, se non é en cinco anos será en dez, pero sairá", engadiu.

O vindeiro 6 de abril será unha das datas claves deste proceso, pois será entón cando viaxen a Madrid o reitor e o comisionado para o Campus do Mar, Emilio Fernández, para "resolver as últimas dúbidas e palpar o ambiente no ministerio", tal como subliñou Gago. Logo, a convocatoria manterase aberta ata a segunda quincena de maio "e darannos un par de meses para, si pasamos o primeiro filtro, presentar o proxecto definitivo cara finais de xullo", explicou o reitor.