Juan Casares Long: “Traballarei polo recoñecemento da USC”

Juan Casares Long (A Coruña, 1950) coincide co seu rival en que abordar o financiamento da USC coa Xunta será unha das súas primeiras medidas se mañá gana as eleccións. No apartado das diferenzas entre un e outro, o catedrático de Enxeñería Química subliña "o carácter plural" da súa candidatura e que as doce persoas que presenta como equipo son todas as que estarán se chega á vitoria. "Eu explicito o que o outro non explicita aínda", advirte o profesor.

Cal é a principal diferenza, ó seu ver, entre a súa candidatirua e a do seu rival?

A experiencia, os anos que levo como a única voz alternativa na universidade. A presenza nestes anos nos órganos de goberno axudaron a coñecer ben cal é a situación da USC.

Se gaña as eleccións, ¿cal será a primeira medida que poña en marcha?

Falaría dun conxunto de accións, e a primeira sería integrarme na comisión que trata o plano de financiamento das universidades galegas. Se é posible, tamén convocarei o claustro antes das vacacións, xa que estamos fóra de prazo para adaptalo á Lomlou. Impulsarei unha serie de medidas que tratarán de facer que o proceso de cambio sexa o máis fluído e o máis
rápido posible.

Hai uns días dous deputados de BNG e PSdeG pedían o voto progresita para o seu contrincante. Hai quen o ve como a opción conservadora, ¿como se definiría vostede?

Non teño ataduras nin condicionantes, síntome moi libre e penso que traballarei só para que a USC sexa recoñecida. E a miña é unha candidatura aberta e plural, onde teñen cabida todas
as sensibilidades.

Rodeouse dun equipo de 12 persoas, á parte da secretaria xeral ¿non son demasiadas para uns tempos de crise?

Non, eu explicito o que o outro non explicita. Ademais, iso non quere dicir que nun momento determinado se hai que quitar ou poñer alguén se faga, pero agora mesmo é un equipo completo, para gobernar.

Facendo autocrítica, ¿en que debe mudar, autocorrixirse a USC?

Temos que corrixir as asimetrías que existen entre campus, centros, departamentos e mesmo áreas de coñecemento, porque debemos garantir a mellor investigación e a mellor docencia.l.