A metade da oferta laboral, para FP

O 44,16% das ofertas de emprego diríxese a titulados de Formación Profesional, nomeadamente ós de grao superior, segundo un estudo da empresa de traballo temporal Randstad. Por comunidades, Madrid e Cataluña concentran o 29% da oferta total para estes titulados.

Os sectores que máis demandan estes profesionais son Administración e Finanzas (16,72% de todas as ofertas para titulados de FP); Produción (13,31%); Informática e Redes (11%); Hostalería e Turismo (7%); Saúde (7%), Comercio e Mercadotecnia (3,5%). Pola contra, Metal, Siderurxia e Automoción perderon peso como xeradores de emprego debido á desaceleración económica. Nos últimos meses destaca un aumento de oferta de emprego en Electrónica e Electricidade. Neste eido, as empresas valoran especialmente as mulleres nos postos de Electrónica pola súa "maior capacidade de atención e control do detalle". Pero non se dá tal diferenciación en electricidade porque a cantidade de donas con estudos deste sector é "mínima".