Hemeroteca web
|
RSS
Luns 21.05.2012
| Actualizado 10.14
 |
| Anxo Teixeiro, no centro, co resto do equipo executivo, foi elixido onte voceiro nacional do novo MEU FOTO: AXENCIAS |
Unha óptica aberta "que debe asegurar a pluralidade e achegar a corrente que hoxe nace, non contra ninguén, senón con vocación integradora e maioritaria á amplitude de estudantado galego". Con esta intención botou onte a andar o novo MEU, Movemento estudantil Universitario.
A Facultade de Medicina acolleu onte a asemblea nacional constituínte ante máis de cen estudantes. Segundo o esperado, o claustral da USC e estudante de 3º de Medicina Anxo Teixeiro saíu elixido voceiro nacional. En palabras do novo líder estudantil, "MEU nace, ou renace, con vocación de aglutinar todo o estudantado que quere afondar no carácter público e galego da universidade.
Aínda que moitos queren ver unha segunda edición da escisión que nos 90 sufriron os Comités Abertos de Facultade, os CAF, en resposta contra o que daquela se viu como deriva a un perfil político que os facía brazo estudantil do BNG, Teixeiro négao e malia recoñecer que xorde contra unha maneira de dirixir "nin aberta, nin plural nin tolerante", salienta a vontade de "sumar e non restar. No Movemento participarán estudantes doutros colectivos e mozos e mozas que proveñen de experiencias vitais e mesmo partidarias diferentes", en palabras de Teixeiro. Seis son os piares nos que se asenta o movemento - "universidade pública, única, galega, internacional, cogobernada e corresponsable"- insistindo na necesidade de colocar os e as estudantes na cerna do sistema
Amais de Teixeiro, o resto da executiva compóñena Pablo Argibay como Responsable de Finanzas; Sergio Folgueira Arias de Organización; Cristina Míguez de Acción Social; Alba Vázquez de Acción Institucional; Pablo Guimeráns de Comunicación e Millán Fernández Responsábel Nacional de Ideas.
"Galicia, o centro das demandas"
Baixo o título, Universidade, de tod@s, O MEU, teu, o acto de clausura centrouse nos retos que a universidade galega ten pendentes e das propostas que achega o MEU. Neste sentido o novo voceiro asumiu este colectivo coma un "punto de encontro de todos os estudantes que desexan unha universidade galega e pública, sen dogmatismos e asumindo a Galicia como o centro da nosa actuación e das nosas demandas". Teixeiro teimou na "necesidade de introducir ao estudantato no centro do sistema e reclamou unha nova cultura universitaria correponsable e integradora". Tamén lle reclamou á Xunta un Plano de Financiamento para o sistema universitario galego, e "que non sexamos nós quen paguemos a crise". Na clausura interviron a concelleira de Educación de Santiago, Mercedes Rosón, o profesor e membro da Executiva Nacional do BNG, Xoán Bascuas e colectivos universitarios como Universidade Aberta ou a A Trabe.
