O "non presentado" pasa á historia na USC: agora contará como suspenso

Unha nova normativa sobre permanencia nos títulos adaptados a Boloña da Universidade de Santiago de Compostela (USC) esta­blece que non presentarse a unha convocatoria pasará a equivaler a un suspenso e, xa que logo, correrá convocatoria. Só haberá excepcións para supostos "de forza maior" que impidan reali­zar as actividades progra­madas e a venia será vía resolución reitoral, segundo recolle a proposta de normativa que onte aprobou o Conse­llo de goberno da USC, aínda que co voto en con­tra dos estudantes dos Comités por considerar que lle impide ó estudante exercer un control sobre os seus estudos e organizarse á súa conveniencia.

A regulación reduce ademais, tal e como obriga o Ministerio de Educación, o número de convocato­rias: as 6 que había en di­plomaturas e licenciaturas quedan en 4 e para os másteres haberá só dúas. Enténdese que o alumno ten dereito a unha convocatoria por curso. Cando chegue á última, poderá solicitar ser cualificado por un tribunal sempre que se presentase ás tres anteriores. Nel non participará a profesora­do que o avaliou nos intentos previos.

A USC endurcerá tamén os criterios de permanencia. Así quen non supere polo menos unha mate­ria en primeiro curso, terá unha segunda oportunidade na que deberá superar polo me­nos 30 créditos, a metade dun curso estándar. Se non o logra, non poderá continuar na USC os mesmos estudos.

O novo marco obriga ademais o alumnado a matricularse no curso seguinte das materias suspensas no anterior, o que é rexeitado polos Comités porque dificulta, denuncian, compatibilizar os horarios dos dous cursos, feito especialmente grave xa que a asistencia ás aulas é obrigatorio nos graos. Amais, non se poderá matricular do último curso da carreira sen ter superadas todas as de primeiro.

Tamén rexeitan os Comités que esta normativa equipara o traballo de fin de grao co proxecto de fin de carreira. "Esta equiparación acarrexará, que para realizar o devandito traballo, sexa preciso ter superadas todas as materias da titulación", rexeitou a responsable de Campus dos Comités, Inma García Escourido, logo de recordar que este traballo é unha materia do últmo curso e polo tanto, se converte nun ano máis da carreira obrigando así a renovar matrícula.

Pero non todo se endurece. A USC permitirá matricularse a tempo parcial se conco­rren "circunstancias de or­de laboral ou persoal que así o aconsellen". Esta mo­dalidade está pensada tanto para persoas con algunha discapa­cidade como traballadores, ou con algunha outra "situación persoal excepcional".