O novo modelo de financiamento universitario estará listo en xullo

O conselleiro de Educación, Jesús Vázquez, anunciou onte que o novo modelo de financiamento universitario se "rematará" en xullo, o que permitirá incorporalo ás contas da Xunta o próximo ano, todo iso despois de que, neste momento, xa exista consenso en catro aspectos diferentes.

Concretamente, en resposta ó deputado do PPdeG Román Rodríguez, o dirixente autonómico explicou que xa hai consenso nos principios do plan de financiamento, antecedentes, estrutura, dimensións e sobre os indicadores dese plan. Así mesmo, avanzou que a próxima reunión da comisión que redacta o plan de financiamento, que xa se reuniu outras tres veces, terá lugar en xullo e nela definiranse os obxectivos do plan, seleccionaranse entre 15 e 20 indicadores e desenvolverase a regulamentación para o control e seguimento orzamentario. "Será un plan de financiamento moderno, flexible, realista e que servirá ás universidades galegas a ser máis competitivas", recalcou Jesús Vázquez, quen sinalou que se buscará a "competitividade" das universidades. Neste punto, recordou que ata agora o plan 2005-2010 estaba vinculado aos ingresos, o que minguaba o financiamento das universidades en épocas de recesión económica.

Doutra banda, o conselleiro de Educación e a parlamentaria do BNG Carme Adán mantiveron onte unha disputa sobre a participación dos centros educativos no proxecto Abalar, que pretende a modernización do ensino coa incorporación de computadores e novas tecnoloxías no ámbito educativo.

Así, Carme Adán acusou de discriminar aos colexios públicos na participación deste programa.