O novo plan de financiamento universitario, sen cambios

Os conselleiros Vázquez e Fernández, esq., presidiron o Consello FOTO: efe

O próximo 1 de xaneiro en­trará en vigor o novo Plan de financiamento pluri­anual das universidades galegas para o período 2011-2015, aínda que o máis correcto sería falar dun modelo de transición que se aplicará durante o ano a piques de empezar, no que se seguirán negocian­do os criterios de repartición de fondos para os catro anos seguintes.

O Consello Galego de Universidades abordou onte as bases para este novo plan nunha sesión mara­toniana que continuaba ó peche desta edición coa análise do Plan galego de I+D+i. Malia a información favorable e sen ningún voto en contra, a Universidade da Coruña amosou a súa desconformidade. Se­gundo explicaron fontes da Universidade da Coruña (UDC), a Xunta non avanzou ningunha cifra global dos fondos correspondentes ó período 2012-2015 e tam­pouco se pechou o catálogo dos criterios para o seu repar­timento. Estas pautas seguiranse negociando en futuras re­u- nións, que poderán pro­longarse, como moi tarde, ata o 31 de xullo de 2011.

O debate sobre a estratexia económica da universidade galega desen- volveuse, polo menos ata onte, lon- xe do alto ton reivindi­cativo da negociación dos dous plans pluria-nuais anteriores. En plena crise económica, a universidade librouse do recorte dos presu­postos da Xunta para 2011, un indulto que xustificaría en parte os ánimos máis acougados dos reitores.

O reitor da Universidade da Coruña (UDC), José María Barja, recorda que a súa institución leva xa tempo apertando o cinto e é o que adoptou un ton máis vehemente. A UDC considérase discriminada por un sistema que ata agora, opina, primou os criterios históricos, é di­cir, á USC que hai agora 20 anos se tripartía coa creación das universidades da Coruña e Vigo.

Pero Santiago está lonxe de sen­tirse privilexiada. No ano 2004 o seu daquela reitor, Senén Ba­rro, mostrábase desconforme co plan de financiamento que a levaría a­ta o final da década e advertía de que tería que desviar fondos de calidade para cubrir gastos co­rrentes. A Consellería de Edu­cación, con todo, calculaba que lle permitiría chegar co su­perávit a 2010.

Foi Barro o que máis se achegou á realidade cos seus vaticinios. Hoxe, a USC conta cun dos selectos selos de Campus de Exce­lencia Internacional concedidos polo Go­berno central, gra­zas en boa medida á repercusión da súa in­vestigación biomédica. O novo plan será o primeiro en computala neste apartado, pero a USC acumula tamén unha lista de infraestruturas docentes e investigadoras estratéxicas pendentes, como as novas facultades de Me­dicina e Odontoloxía, cuxo fi­nanciamento segue sendo unha incógnita.

O novo reitor da USC, Juan Ca­sares Long, afástase do ton combativo do seu predecesor, opta por cinguirse á rea­lidade e anuncia que, a diferenza dos de 2010, os orzamentos da institución para 2011 non re­correrán á débeda.

Desde a Universidade Vigo, o tamén novo reitor, Salus­tiano Mato, deu un paso máis aló en diplomacia académica e recoñeceu que a conxelación de finan­ciación universitaria en 2011 é unha boa noticia.

A pesar de empregar o mesmo ton tranquilo, entre a USC e a Universidade de Vigo hai unha diferenza substancial. A vinteleira institución vigue­sa vive un momento doce tras conseguir hai unhas semanas o mesmo selo de Excelencia Inter­nacional da USC para o seu Cam­pus do Mar, pero a súa situación económica está moi lonxe da compostelá. As "hipotecas" da vella Fonseca superan os 70 millóns de euros.