O Consello Escolar rexeita o borrador da Lei de convivencia

A CIG convocou unha manifestación de protesta ante o Consello Escolar FOTO: ANTONIO HERNÁNDEZ

O pleno do Consello Escolar de Galicia solicitou a devolución do borrador de anteproxecto de Lei de convivencia e participación da comunidade educativa á Consellería da Educación, tras prosperar unha emenda á totalidade.

O proceso careceu do que debe promover: a participación de todos os axentes implicados na educación. Este é un dos argumentos máis reite­rados entre as organizacións que onte apoiaron no Consello Escolar de Galicia as emendas á totalidade contra ou antepro­xecto de Lei de Convivencia e Participación da Comuni­dade Educativa presentado pola Consellería de Edu­cación. Pero a opinión deste órgano, o de máxima representación social do eido educativo, é pre­ceptiva pero non vinculante, e a Xunta xa anunciou que seguirá adiante co texto, que podería entrar no Parlamento a finais de febreiro.

Oito organizacións -CCOO, UXT, CIG, a Confe­deración de AMPA de cole­xios públicos Confapa, tres movementos de renovación pedagóxica e o Seminario de Estudos Galegos- pre­sentaron as súas respectivas emendas á totalidade, que se votaron de forma conxunta. Ó seu favor emitíronse 21 votos (o 52,5%), 11 en contra (entre eles os de Congapa, a patronal de centros concertados, o sin­dicato Anpe e representan­tes de municipios do PP- Outros dous votos foron abs­tencións, unha dos colexios relixiosos.

Tras o resultado, Educación manifesta nun comuni­cado a súa "vontade de acadar ou máximo consenso" e des­taca que o feito de que prosperasen as emendas á totalidade "truncou a análise e o debate das res­tantes 180 emendas que poderían enriquecer o an­teproxecto". Parte delas, suxire, poderían ser tidas de to­dos modos en conta.

A CIG manifestou dentro do Consello Escolar, e tam­én ás súas portas, o rexeitamento á proposta lexislativa porque considera que Edu­cación actuou de costas ó profesorado, pero tamén pola súa "pretensión de dar cobertura legal para que as familias participen na definición da política educativa e idiomática" a través do mecanismo para consultalas contemplado no texto.

O secretario nacional da CIG-Ensino, Anxo Louzao, advertiu ao titular de Educación, Jesús Vázquez, de que se atopa "totalmente deslexitimado" para a realización das consultas sobre o idioma, tras acusar á Xunta de impulsar esta nova Lei co único fin de legalizar que os pais poidan escoller a lingua das materias e así reducir a presenza do galego no ensino". "Outra derrota na súa cruzada contra o galego", destaca.

A consulta é tamén criticada pola Confapa. "Lonxe dunha participa­ción activa, o que agora se regula é unha consulta uni­direccional sen matices nin controis", advirte a confe­deración, que bota ademais en falta referencias á par­ticipación das familias como axentes educadores na vida dos centros ou sobre o papel das asociacións de nais e pais.

Para Congapa, a repre­sentación das familias prevista no texto son in­suficientes, pero a confede­ración de AMPA de centros concertados coincide coa Xunta en lamentar que as emendas á totali­dade impedisen abordar propostas para melloralo. Ó ver do seu presidente, Jorge Villarino, o resulta­do demostra que as organi­zacións priman "os intereses políticos" e impiden "un debate construtivo". CCOO, pola contra, atribúe a teima política a Educación e la­menta que poida seguir adiante coa lei malia o resultado. "Non dicimos que non haxa un­ha lei de convivencia, pero dende a perspectiva da par­ticipación fíxose de forma unilateral", expresa José Fuentes.