Piden aclarar se houbo trampa co acceso ó MIR de estranxeiros

O presidente da Organización Médica Colexial (OMC), Juan José Rodríguez Sendín, pediulle onte ó Ministerio de Educación aclarar se houbo "trampas" ou "portas falsas" que permitan que o 45% dos Médicos Internos Residentes (MIR) deste ano sexan estranxeiros non comunitarios.

Rodríguez Sendín fixo estas declaracións despois de que a Confederación Estatal de Sindicatos Médicos (CESM) denunciase supostas irregularidades nos exames de xaneiro, que derivaron nunha situación con "consecuencias negativas" tanto para os licenciados españois como para a sociedade.

O presidente da OMC matizou que "o que se insinuou é que houbo unha especie de recoñecemento exprés dos méritos que lles permitiron presentarse á convocatoria, pero eu non teño ningunha constancia", recalcou. Rodríguez Sendín explicou que os convenios subscritos con algúns países non comunitarios así como o ordenamento xurídico español permiten que calquera médico, cuxo título estea convalidado neste país, poida concorrer ó MIR e exercer a súa profesión en España. "Outra cuestión é preguntarse se todos os que accederon deses médicos extracomunitarios ó exame MIR cumprían de forma adecuada todos os requisitos en tempo e forma", e insistiu en que "o que hai que comprobar dun xeito claro" é se houbo "trampas" ou "portas falsas" para acceder ó recoñecemento dos seus títulos en España.

O Ministerio de Sanidade cualifica de "arbitraria" a afirmación da CESM de que o 45% dos MIR este ano serán non comunitarios xa que "a proporción final dependerá de cantos tomen finalmente posesión", e valorou que a incorporación ó sistema de profesionais estranxeiros cobre o "desfasamento" actual entre a necesidade de médicos e a produción de novos licenciados.

Ademais, negaron que os licenciados españois saian prexudicados e así lembra que o número de prazas MIR de 2009-10 ascende a 6.948 e que se admitiu a 13.480 aspirantes, dos que finalmente se presentaron ó exame 11.525 (85%). Deles, 6.420 (55%) eran licenciados españois, 486 (4%) licenciados de países comunitarios e 4.619 (40%) procedentes de países non comunitarios.

Isto significa, segundo Sanidade, que 900 licenciados en España non se presentaron. Amais, realizada a proba, só se excluíron 92 aspirantes por obter unha puntación negativa, dos que 56 foron licenciados en facultades españolas, cinco de facultades de países comunitarios e 31 de extracomunitarias.