PSdeG: o plan de investigación é o "camiño da catástrofe"

O PSdeG solicitou a comparecencia no pleno do Parlamento autonómico do conselleiro de Economía e Industria, Javier Guerra, para explicar o novo plan de investigación da Xunta que, ao seu ver, non aposta pola incorporación de novos investigadores e sitúa a Galicia "camiño da catástrofe".

Anunciouno o voceiro de Economía, Industria e Innovación do Grupo Parlamentario dos Socialistas, José Luis Méndez Romeu, moi crítico co plan recentemente presentado en sociedade e que, na súa opinión, ten "os mesmos defectos" dos oito "plans anteriores" presentados pola "prolífica" Xunta: "moita retórica e vaguedades, e poucos datos". Nunha roda de prensa celebrada na Cámara galega, alertou de que este plan "non se corresponde" coas necesidades da empresa, da universidade e dos centros de investigación especializados. "Pon a Galicia un rumbo moi escuro", insistiu, cunha investigación e unha empresa "cada vez menos competitivas" e un equipo de investigadores abocados a traballar "para empresas de fóra".

Méndez Romeu denunciou que o plan acumula "dous anos de atraso" e supón "unha regresión" aos niveis investigadores "da Xunta de Fraga" despois do "punto de inflexión" que supuxo o Plan Incite, impulsado polo anterior Goberno bipartito. O documento presentado polo presidente Alberto Núñez Feijóo e por Guerra ten, lamentou, un "perfil moi baixo".

Ao tempo, alertou do "irreal que supón fixarse como obxectivo" destinar a I+D o 2% do PIB en 2015 e o 3% en 2020 cunha participación do sector privado do 75%. A xeito de exemplo, esgrimiu que en 2005 o investimento en I+D era do 0,87% do PIB, porcentaxe que o bipartito "elevou ata o 1,04%" en 2008, e que agora o PP "volveu reducir" ata o 0,96% en 2010.

Na súa intervención ante os medios, Méndez Romeu advertiu de que, a pesar de que a Xunta defende captar investigadores de prestixio "non explica como" e remarcou que, do mesmo modo, fala de "consolidar" grupos de investigadores, pero, non obstante, "recoñece que actualmente hai 600 e só anticipa a consolidación de ao redor de 300".

"Nada se di dos instrumentos nin dos 300 grupos restantes que quedarían fóra do sistema", lamentou o deputado socialista, antes de destacar a "dificultade" coa que se atopará un doutorando para desenvolver a súa carreira científica en Galicia a día de hoxe, mentres que o bipartito, recordou, "chegou a contratar 500 investigadores".