Os reitores asinan a candidatura do Campus do Mar

Os reitores das tres universidades galegas asinarán esta mañá o acordo de colaboración entre as tres institucións académicas para presentar a candidatura conxunta para concorrer co proxecto da UVigo do Campus do Mar á convocatoria de Campus de Excelencia Internacional.

A Universidade de Vigo presentará oficialmente o resumo do proxecto de Campus do Mar ante o Ministerio de Educación, para o concurso de campus de excelencia internacional, o 31 de maio. Trátase dun documento de case 80 páxinas onde se recollen os obxectivos, infraestruturas e apoios e colaboracións con que conta a iniciativa . Se o proxecto pasa este primeiro filtro, haberá dous meses para presentar o proxecto definitivo.

Sobre as posibilidades de éxito, o reitor Alberto Gago ten salientado a súa localización privilexiada como é a Antiga Escola de Transmisión e Electrónica da Armada, ETEA, e o apoio dos sectores da pesca, a acuicultura e o naval da cidade . A UVigo achega 500 doutores en ciencia e tecnoloxía mariña, que aumenta a entre 1.200 ou 1.500 cos das outras universidades galegas e tres do Norte de Portugal. Ó ver de Gago "o proxecto sairá adiante, se non é en cinco anos será en dez, pero sairá".