Os reitores confórmanse con recibir o mesmo ca este ano

Os reitores Casares e Mato, á dereita, e Barja, á esquerda, selan o acordo coa conselleira Beatriz Mato

En vista de que os presupostos da Xunta para o 2011 anuncian recortes por todos os lados, os tres reitores das universidades galegas aspiran a quedar como están e recibir a mesma asignación presupostaria có pasado exercicio. Esta é a visión que trasladou onte o reitor da Univer­sidade de Vigo, Salustiano Mato, en nome tamén dos seus homólogos de Santiago e da Coruña e que parece deixar clara a asunción "do esfor­zo proporcionado" que o presidente da Xunta lles pedía o luns na inaugu­ración do ano académico, a cambio de que a univer­sidade non sexa a que máis sufra a crise.

"Creo que as palabras do presidente correspon­den con que vai haber un­ha aposta pola educación superior e a investigación. A valoración teremos que facela en función das cifras que se manexen. Nós xa sufrimos un recorte impor­tante no 2010, así que se sufrimos o mesmo recorte medio dos orzamentos po­demos falar de que non hai aposta. Sufrir menos recorte cá media, estará habendo aposta e, eviden­temente, se quedamos como estamos, podemos cualificalo como unha gran­de aposta", explicou Mato.

O reitor compostelán, pola súa banda, valorou que o futuro plan de financiamento contemple a investigación dentro das achegas estruturais. "Será a pri­meira vez que aparecerá reflectida expresamente nestas achegas", subliñou Juan Casares.

En resposta a outra de­manda de Feijóo, os reito­res tamén destacaron que os campus xa colaboran estreitamente. "Levamos dous días xa demasiados xuntos!", chanceou o coru­ñés José María Barja, un día despois da presentación conxunta da candidatura Campus do Mar, liderado pola UVigo, á convocatoria de Campus de Excelencia internacional.