Hemeroteca web
|
RSS
Luns 21.05.2012
| Actualizado 10.14
 |
| O reitor saínte, Gago, dereita. entrégalle o bastón de mando a Mato en presenza de Feijóo FOTO: Xoán Crespo |
O novo reitor da Universidade de Vigo, Salustiano Mato, prometeu onte o seu cargo nun acto presidido polo titular da Xunta de Galicia, Alberto Núñez Feijóo, e cun discurso no que pediu os "recursos necesarios" para que esta institución académica poida ser "dinamizador económico e social" de Galiza.
Mato, que agradeceu o traballo dos seus antecesores e felicitouse por recibir en herdanza unha Universidade "cun magnífico presente", insta o presidente da Xunta a liderar, xunto coas universidades galegas, un "lobby" para o país e pediulle que lles "poña deberes" a estas institucións. Iso si, reclamou, como "contrapartida" que "dispoña os recursos necesarios encima da mesa", xa que as universidades "serán un investimento" para Galicia. Ademais da internacionalización e a proxección exterior, o novo reitor fixou como obxectivo primordial facilitar a inserción laboral dos alumnos, para o que se necesita, reiterou, "a complicidade do Goberno galego e, sobre todo, unha alianza estratéxica cos axentes socioeconómicos".
Fronte ás continuas alusións do reitor ós recursos económicos, o presidente da Xunta, Alberto Núñez Feijóo, limitouse a constatar que a actual crise redundou nunha diminución das partidas destinadas a Educación. No entanto, puxo en valor o papel da Universidade como "investimento" e no seu "liderado social global".
Feijóo felicitou a Mato, ao que lle recordou que ten "o reto e a responsabilidade de seguir construíndo a Universidade con calidade e proxección internacional", así como "o reto de facer máis con menos", é dicir, de "suar a camiseta". "Non te preocupes porque somos varios", ironizou o presidente galego, en relación coas dificultades de financiamento.
"En galego fanse ciencia, transferencia e docencia"
A transferencia de coñecemento e a apertura á sociedade son outros dos "desafíos" que subliñou Salustiano Mato, quen tamén fixo referencia á promoción e utilización da lingua galega. "En galego fanse ciencia, transferencia e docencia; co galego valemos máis", recalcou, e recordou que, coa lingua de Galicia hai "portas abertas" a mercados como o de Brasil, "a terceira potencia emerxente mundial e a primeira de toda América".
Entre os momentos máis emotivos, destacou a entrega da medalla de reitor e o bastón de mando a Salustiano Mato por parte do reitor saínte, o profesor Alberto Gago.
Financiamento por obxectivos
Salustiano Mato tamén se pronunciou sobre a necesidade dun sistema de dirección estratéxica na Universidade de Vigo, desde a cal se promova un modelo de financiamento na negociación coa Xunta, na que "o volume total do orzamento debe alcanzar a media das universidades españolas". Tamén apostou por un modelo de contrato-programa "por obxectivos", de maneira que as universidades reciban fondos "en función dos resultados", para "non perpetuar a ineficiencia premiándoa". "Seremos austeros, pero isto non debe ser a escusa para non facer nada", concluíu.
O novo reitor agradeceu o apoio da comunidade universitaria na súa elección, e prometeu "manter un diálogo social permanente" cos sindicatos, crear un clima laboral "amigable e harmónico", e acabar coa "imaxe tradicionalista e conservadora da Universidade envarada, altiva e illada".
O presidente da Xunta eloxiou o potencial investigador da Universidade de Vigo, así como proxectos estratéxicos, como o Campus do Mar. Tamén apuntou que a adaptación ao Espazo Europeo de Educación Superior será unha "oportunidade" para que a Universidade de Vigo "atope un oco digno no sistema universitario español e internacional". Ao acto de onte acudiron autoridades como a presidenta do Parlamento, Pilar Rojo; o conselleiro de Educación, Jesús Vázquez; deputados do Parlamento galego como Carlos Aymerich, Abel Losada, ou Ignacio López Chaves, ou o director xeral de Caixanova, José Luis Pego.
