Tres reitorables á USC presentan candidatura o primeiro día de prazo

Lourenzo Fernández Prieto, catedrático de Historia, onte en Santiago FOTO: AXENCIAS

Coa presentación oficial de tres candidaturas, onte deuse o disparo de saída da carreira para remudar o reitor senén Barro na cadeira da Universidade de Santiago.

O sábado foi o primeiro día para presentar as candidaturas ó reitorado de Fonseca, pero coa ponte polo medio, na práctica trasladouse a onte. A metade dos candidatos, Laura Sán­chez Piñón, Lourenzo Fernán­dez Prieto e Juan Casares Long, elixiron esta primeira xornada para formalizar as súas candidatu­ras. Os tres restantes farano ó longo desta semana ou mesmo á volta das vacacións de Semana Santa.

A máis madrugadora foi Lau­ra Sánchez Piñón. A catedráti­ca de Xenética e ex conselleira de Educación co anterior goberno bipartito entregou a instancia na que confirma a súa candi­datura no rexistro da USC no Campus de Lugo. Foi sobre as nove e media da mañá, para chegar a tempo á visita de Campus Vida do ministro de Educación. A profesora de Veterinaria acudiu acompaña­da por un representante de cada un dos tres eixes da comu­nidade universitaria: o decano da Facultade de Ciencias de Lugo, Francisco Fraga; Margari­ta Abuín, persoal de adminis­tración e servizos; e Javier Miragaya, alumno.

Sánchez Piñón cualificou o pro­xecto que lidera como plural e integrador, compartido por un grupo numeroso de membros de distintos ámbitos da comu­nidade universitaria que "senten e aman a universidade" e que ven no seu futuro desenvolvemento do coñecemento e proxección in­ternacional. A xenetista salientou un programa que "xira en torno ó alumnado, o auténtico motor da universidade. Todos os demais temos que pensar nesa formación. A universidade é o lugar onde nos facemos máis cultos, máis solidarios. Onde aprendemos a convivir e iso debe conformar o corazón do proxecto", manifestou.

Unha hora despois, en Santiago, o catedrá­tico de Historia Contemporá­nea presentaba a súa candidatura e insistía na invitación lanza­dá ós seus rivais: a celebración de polo menos tres debates entre todos eles -un por campus-, ós que confirmou que irá "sen pór ningún tipo de condicións". Sobre a posibilidade de que haxa fusións, o candidato reiterou tamén que haberá tempo para iso, pero que agora o que se abre é o de "competir en termos democráticos".

Fernández Prieto acudiu en solitario ó rexistro, mentres que Juan Casares Long -o único candidato que repite, catro anos despois de enfron­trarse a Senén Barro - fíxoo arroupado por un grupo de uni­versitarios. Entre eles, rostros que xa o acompañaron no 2006 -como Mercedes Pintos, José Ignacio Zarra, Jesús Aira o Eva Castro-, e outros novos como a profesora de Psicoloxía Carmen Fernández Morante ou o de Historia Javier Garbayo, José Manuel González, Sara Cantorna, Luis Velasco, Lourdes Noya e Jesús Aboal.

Casares subliñou o valor da súa experiencia na oposición. "Podo dicir que teño un coñecemento polo miú­do da USC. A universidade do futuro, engadiu, debe estar "aber­ta ao diálogo", ser transparente, contar con todos e "implicada e comprometida", salientou.