Triplicouse o número de Ramón y Cajal sen estabilizar

A Asociación Nacional de Investigadores Ramón y Cajal (ANIRC) sinalou que o Goberno non está retendo un "valioso" capital humano en materia de investigación e capacidade de innovación a pesar de que leva tempo asegurando que quere "cambiar o modelo produtivo por un de coñecemento". A través dun estudo, ANRIC denunciou que, con respecto a 2003, se triplicou o número de bolseiros que non foron estabilizados e culpan a "os recortes orzamentarios" desta situación.

A asociación elaborou o Informe sobre o impacto dos recortes orzamentarios na consolidación de investigadores Ramón y Cajal, no que se cuantificou as dificultades na estabilización dos bolseiros que obtiveron o seu contrato entre os anos 2004 e 2006, as promocións que ANRIC considera como as afectadas pola crise económica.

Así, un total do 39,1% dos 750 investigadores que obtiveron o seu contrato neste período responderon á enquisa, que determinou que o 22,7% dos "Ramón y Cajal" de 2004, o 45,9% dos de 2005 e o 62,9% dos de 2006, non foron estabilizados.Neste sentido, ANRIC sinala que os datos contrastan coas porcentaxes de non estabilización entre 2000 e 2003 que oscilaron entre o 8 e o 15 por cento.

Só o 48 % acaban como profesor titular

A asociación sinala que "só o 48 por cento dos Ramón y Cajal se estabiliza como profesor titular mentres que o resto faino noutras figuras contractuais de menor categoría.

Do informe tamén se desprende que se observan profundas diferenzas entre os patróns seguidos na Universidade e o Consello Superior de Investigacións Científicas (CSIC), os dous grandes receptores do programa. Así, destaca que mentres que na Universidade o 91% deles se estabiliza no seu mesmo centro, no CSIC esta porcentaxe descende ó 76% (o 24% restante estabilízase normalmente tamén no consello aínda que noutro centro). Do mesmo xeito, obsérvase que ó redor do 9 por cento dos bolseiros da universidade terminan estabilizados no CSIC, mentres que na dirección contraria a porcentaxe é moito menor.