Unha tensa Comisión de financiamento

A Comisión de financiamento delegado do consello Galego de Universidades (CGU) reunirase hoxe para consensuar o panel de indicadores do novo plan de financiamento do Sistema Universitario de Galicia para o período 2011-2015, que entrará en vigor en xaneiro do próximo ano. Segundo explicou a Consellería de Educación, a convocatoria deste encontro responde ao cumprimento dos "prazos" acordados na reunión do CGU o mes de xullo pasado, onde, por unanimidade, se estipulou unha folla de ruta cuns criterios "básicos" para a repartición das cantidades ás universidades de Santiago de Compostela, A Coruña e Vigo no próximo quinquenio.

Educación subliñou que se está a traballar na distribución de fondos entre as tres universidades "en beneficio dos estudantes", para destacar, ao tempo, que "dende hai anos" o financiamento universitario non está baseado na repartición de fondos "por estudantes", senón no "gasto corrente" das universidades, sobre todo no que se refire ao custo do cadro de persoal. En canto ás bases do novo documento, introduciranse mecanismos como o plan de sostibilidade e o panel de indicadores co fin de que se poida, "de forma gradual", modificar o financiamento das universidades en función de que alcancen os obxectivos fixados, dando unha resposta "aos esforzos reais e aos seus resultados". A reunión da Comisión de financiamento producirase xusto unha semana despois do cruzamento de mensaxes entre Xunta e universidades, protagonizado polo presidente galego, Alberto Núñez Feijóo, e o reitor da Universidade de Santiago de Compostela (USC), Juan José Casares Long, quen interveu en nome dos seus colegas da Coruña e Vigo no acto de apertura do novo curso académico. Neste encontro, Casares Long avisou de que é "un imperativo" que a sociedade galega, a través dos seus representantes, se comprometa co sistema universitario, "priorizar" no próximo plan de financiamento o apoio á súa actividade e desenvolvemento para lles garantir "un futuro de máis benestar" ás xeracións vindeiras. Ao tempo, recordou que este chamamento se produce no "histórico" marco de adaptación ao Espazo Europeo de Educación Superior (EEES) e que o debate coincide co arranque dun novo modelo sen que, "en ningún momento", as administracións públicas fixeran "unha valoración do esforzo económico" que isto supón para as universidades.

Pola súa banda, Núñez Feijóo respondeu, neste acto, á petición de compromiso cun chamamento "ao consenso, ao acordo e á unidade" e instou as institucións universitarias da comunidade para seguir o exemplo de Caixa Galicia e Caixanova, apostando pola "cultura da unidade" como "forza motora". Igualmente, e aínda que garantiu que o seu Goberno non fará da universidade unha das principais vítimas da crise, o presidente avisou de que "haberá que adoptar decisións" e manifestou o seu desexo de que estas se materialicen a través "de acordos", ao tempo que aconsellou "apoiarse na riqueza do capital humano.