Hemeroteca web
|
RSS
Luns 21.05.2012
| Actualizado 10.14
 |
| O catedrático de Anatomía Patolóxica da USC Juan Varela Durán FOTO: PATRICIA SANTOS |
A dous días de finalizar o prazo de presentación de candidaturas, o profesor da Facultade de Medicina Juan Varela Durán confirmaba onte a súa participación na batalla polo reitorado da Universidade de Santiago de Compostela (USC). A candidatura do catedrático de Anatomía Patolóxica súmase ás outras seis xa confirmadas, sendo a única do ámbito das ciencias da saúde. Este promete ser un dos temas fortes en campaña tanto polo futuro do proxecto de Campus Vida como pola polémica da regulación da docencia clínica fóra de Santiago, que o 25 de marzo foi motivo dun pacto por parte dos, daquela, seis reitorables en apoio á facultade e en contra do protocolo asinado polos tres reitores con Sanidade e Educación.
Varela esperou ata o último momento para confirmar as súas intencións, que hoxe mesmo oficializará, ás once da mañá, no rexistro de San Xerome, en Santiago. A última en facelo será a catedrática de Química Analítica Pilar Bermejo, que esperará á unha da tarde.
A candidatura de Varela é a que parte con máis posibilidades de lograr o apoio de Converxencia Universitaria (CU), que historicamente foi chave para formar goberno. Nas últimas lexislaturas a plataforma docente conservadora formou parte dos equipos reitorais de Barro e Darío Villanueva, ambos da Plataforma Universitaria Progresista (PUP), de signo socialista.
Hai outros dous aspirantes do agrado de CU: Juan Casares Long, que repite tras rivalizar en 2006 con Barro; e Mercedes Brea, que ten o apoio da PUP, que por primeira vez non presenta candidatura propia.
A ex conselleira socialista de Educación Laura Sánchez Piñón concorrerá tamén como independente, aínda que se espera que leve parte dos votos da PUP.
Universidade Aberta (UA), o colectivo docente nacionalista, apoiará a Lourenzo Fernández Prieto, ata o ano pasado o vicerreitor de Relacións Institucionais. Tras ser tradicionalmente a oposición da PUP, UA apoiou en 2006, nun pacto inédito, a Senén Barro, que constituíu un goberno tripartito que fixo augas tres anos despois, coincidindo co abandono do goberno de Fernández Prieto para preparar o proxecto electoral de UA.
A rival máis directa de Fernández Prieto sería Pilar Bermejo: ambos foron compañeiros no equipo co que Xosé Manuel Sabucedo competiu contra Barro no 2002.
O decano de Bioloxía, Jaime Gómez Márquez, será tamén dos que concorra sen apoios expresos.
Concorrencia inédita
As do 5 de maio serán as eleccións máis disputadas na historia da USC. Serán sete os candidatos. Amais de Juan Varela Durán, preséntanse Laura Sánchez Piñón, Pilar Bermejo, Mercedes Brea, Juan Casares Long. Lourenzo Fernández Prieto e Jaime Gómez Márquez. É máis que previsible unha segunda volta entre os dous candidatos máis votados. Sería o 24 do mesmo mes.
"Vigo terá Medicina máis cedo ca tarde", di Caballero
O alcade de Vigo resucitou onte unha vella reivindicación da cidade que deixara aletargada. Abel Caballero advertía onte que "ninguén crea que Vigo vai quedar sen a súa facultade de Medicina" e aseguraba que a imos ter máis pronto que tarde". O seu homólogo en Santiago, Xosé Sánchez Bugallo, considerou "disparatada" a idea de duplicar ou triplicar estes estudos.
A construción dunha facultade de Medicina nas seus campus é unha vella aspiración da Coruña e de Vigo. Desde as dúas principais cidades galegas arguméntase que as 350 plazas que oferta a titulación en Santiago non son suficientes para formar a todos os médicos que necesita Galicia. En Santiago crese que a demanda responde máis a unha batalla localista.
"É mellor ter unha soa facultade punteira, que facer tres vaia por deus miña xoia", insistía onte o alcalde compostelán. Sánchez Bugalo apelaba tamén ó contexto de crise. "Cando non hai financiamento para garantir o funcionamento ordinario das universidades, vir duplicar ou triplicar estudos é absolutamente pouco sensato", aseguraba o rexedor da capital galega.
A falta de fondos é a única traba para o rexedor vigués, que di que só será condescendente, "e razoable", en esperar ó momento oportuno para que as institucións dispoñan da capacidade económica.
