Vázquez non ten vontade dun novo plan financeiro, di o PSdeG

O PSdeG denunciou onte que a Xunta e, en concreto, o conselleiro de Educación, Jesús Vázquez, non teñen "vontade real" de dialogar o financiamento autonómico coas universidades galegas e teme unha nova "redución" do presuposto para estas institucións educativas en 2011. A voceira en materia de universidades do Grupo Parlamentario do PSdeG Concepción Burgo recordou que a Cámara galega aprobou unha iniciativa para realizar un plan de financiamento das universidades galegas para dotalas de "recursos abondos" e que abranguese ata 2015. "Houbo só dúas reunións e séguese un método caótico con grande improvisación", denunciou. Burgo asegura que os documentos achegados ás universidades "son globais e non achegan ningunha cifra", ao tempo que elimina o compromiso de incrementar o 1% os presupostos para estas institucións académicas, o que, sospeita, pode levar oculto "o obxectivo final de reducir en 2011" os presupostos.