Vigo elixe hoxe reitor entre Mato e Cabeza

Mato, de Alternativa Universitaria FOTO: AXENCIAS

A Universidade de Vigo elixe hoxe o substituto do Alberto Gago á fronte do reitorado. Salustiano Mato, candidato de Alternativa Universitaria, e Jaime Cabeza, liderando Nova Universidade, disputan o apoio dos máis de 23.600 estudantes, docentes, investigadores e persoal administrativo e de servizos que compoñen a comunidade universitaria olívica.

A campaña electoral pechou xa o martes cos dous candidatos apelando ao "cambio". Mentres Cabeza explicou que as dúas candidaturas demandan un "xiro" total das políticas actuais, se ben precisou que "unha é herdeira do pasado -en alusión a Alternativa- e outra non", Salustiano Mato defendeu o seu "equipo potente, moito mellor e con moita máis experiencia". "Seguimos sendo máis alternativa de nós mesmos ca ninguén", sentenciou.

O censo de membros da Universidade de Vigo elévase a 23.673 persoas (un 9,29% menos ca nas anteriores eleccións), das cales, 913 son doutores con vinculación permanente á Universidade -teñen o 51 por cento do voto ponderado-; 1.090 son persoal docente e investigadores -co 9% do voto-; 698 son persoal administrativo e de servizos -cunha representación do 10%-; e 20.966 son estudantes -aglutinan o 30% do voto-.

As mesas abriranse ás 10.00 horas da mañá e pecharanse ás 19.00 horas, de forma que o nome do próximo reitor coñecerase a partir das 21.00 horas, mentres que a composición do Claustro se fará pública previsiblemente ao día seguinte.

Sistema pioneiro a prol da paridade no claustro

A principal novidade nas eleccións de hoxe será a forma de votar o Claustro, xa que se estableceu un sistema -pioneiro nas universidades galegas-, de acordo cos Estatutos da Universidade e coa Lei de igualdade, para que se fomente a paridade entre homes e mulleres. De feito, o número de representantes femininas de cada sector aumentou nestas eleccións, agás no caso dos estudantes.

Así, establécese que, do número de candidatos e candidatas que se poden votar, só un 60 por cento poderán ser do mesmo xénero. Para facilitar o voto, en cada papeleta haberá dúas columnas, unha cos candidatos e outra coas candidatas, así como o número máximo de persoas ás que se pode votar (e o número máximo de representantes do mesmo sexo).