A Xunta apoiará os investigadores que sexan "eficientes"

O conselleiro de Economía e Industria, Javier Guerra, garantiu que o apoio da Xunta ós investigadores "eficientes" non vai desaparecer "nin este ano nin nos próximos", pero apostou por "cambiar" o modelo dos programas de innovación e investigación, porque os profesionais necesitan "atopar un posto de traballo". Así se pronunciou en resposta á deputada socialista Concepción Burgo, que se interesou polo futuro dos investigadores que dependen de programas como o "Manuel Colmeiro" ou o "Parga Pondal", ao que Guerra respondeu que a Xunta renovará este exercicio o seu apoio a estes programas. "A convocatoria das prórrogas está elaborada e pendente de tramitación", apostilou.

Con todo, Guerra insistiu na necesidade de "reflexionar" para adaptar "á realidade" do mercado de traballo estes programas posto que, sinalou, os investigadores deben ser despois capaces de atopar un posto de emprego xa sexa na universidade, en centros tecnolóxicos ou en empresas unha vez concluída a súa bolsa.

Con tal fin, a Xunta fomentou un programa para introducir ós profesionais da innovación nas empresas. "Se este concepto cala e as empresas responden, que o farán, non haberá problemas de traballo para eles", prognosticou Guerra, tras reafirmarse en que o programa da Xunta en materia de recursos humanos de I+D é "o máis importante" de España. "Hai un investimento de 25 millóns de euros", concluíu Guerra.