Hemeroteca web | RSS  RSS     Xoves 29.09.2016 Actualizado 21:26
El Correo Gallego Radio Obradoiro CorreoTV Anova multiconsulting

Galicia Hoxe

Noticia 1 de 1 Galicia  |   RSS - Galicia RSS

temporal

400 efectivos e 160 máquinas para garantir a circulación nas vías galegas

Alerta por baixas temperaturas nas montañas de Lugo e Ourense

SANTIAGO. EP  | 02.02.2012 
A- A+

O presidente da Xunta, Alberto Núñez Feijóo, anunciou que a Administración galega mobilizará 400 efectivos e 160 máquinas para garantir a circulación nas estradas de titularidade autonómica nestes días, nos que Galicia, como o resto de España, está en alerta por baixas temperaturas, que seguirán en descenso ata o sábado.

Tras o Consello da Xunta, Núñez Feijóo destacou que Galicia dispón de 9.000 toneladas de sal e que o plan de viabilidade invernal está preparado co fin de poder facer fronte a calquera incidencia que se produza nas próximas horas.

Dito isto, instou a tomar precaucións á hora de circular, "especialmente" durante esta noite e as primeiras horas deste venres. Por último, subliñou que o resto de administracións --locais e estatal-- preparan tamén os seus propios medios.

ALERTA AMARELA NA MONTAÑA DE LUGO E OURENSE

A montaña de Lugo e de Ourense, así como o Sur da provincia ourensana e a bisbarra de Valdeorras permanecerán este venres en alerta amarela por temperaturas baixas que poden descender por debaixo dos seis graos baixo cero nalgúns puntos.

Segundo o boletín do tempo meteorolóxico adverso de MeteoGalicia para este venres, día 3, continuará sobre Galicia a masa de aire frío, polo que é probable que as temperaturas descendan lixeiramente con respecto ás do día anterior, ampliándose as zonas afectadas por temperaturas mínimas moi baixas.

En concreto no Sur de Ourense e Valdeorras ata as 12.00 horas prevense temperaturas que poden situarse por debaixo dos catro graos baixo cero.   Pola súa banda, ata o mediodía deste venres as temperaturas poden descender por debaixo dos -6 graos na montaña de Lugo e de Ourense.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS