500 solicitudes de emprego para 25 postos en 4 horas nunha feira en Santiago

A dificultade que supón atopar un traballo na actualidade quedou reflectida na xornada inaugural da 'II Feira Internacional do Emprego', que se celebra en Santiago de Compostela e que pechará as súas portas este venres. En pouco máis de catro horas, unha cadea de supermercados recolleu 500 currículos de persoas interesadas nun dos 25 postos de traballo que ofrece a empresa.

Dende primeira hora, o recinto compostelano recibiu un grande número de persoas en busca dunha oportunidade; algo que, non obstante, choca cunha realidade na que as ofertas de traballo brillan pola súa ausencia. O obxectivo da 'II Feira Internacional do Emprego' é actuar como punto de encontro entre os demandantes de emprego e as empresas.

"Estas iniciativas non sei se axudan, pero, polo menos, nos dan esperanza, que é a único que nunca podemos perder," afirmou a Europa Press un traballador en activo, pero con contrato temporal. Non obstante, e ante o contexto económico actual, pretende "abrirse portas" deixando o seu currículo alá onde pode. "Nunca se sabe", di esperanzado.

Outra nova muller, neste caso en situación de desemprego, comentou que está a deixar o seu currículo "en todos os sitios", xa que, aínda que busca algo relacionado cos seus estudios de administrativa, le "dá igual" mentres a chamen dalgún lugar de traballo.

En apenas catro horas, o posto que a cadea de supermercados 'Mercadona' ten no pavillón santiagués recibiu máis de 500 solicitudes para as 25 vacantes que a empresa valenciana busca cubrir. Un desfase entre oferta e demanda que se pode apreciar doadamente con observar a masa de xente que se achega currículo en man ao Fontes de Sar, e comparala cos 405 postos de traballo que presentan as empresas participantes no salón.

No acto de apertura da feira, o alcalde de Santiago de Compostela, Ángel Currás, fixo referencia a esta diferenza, cualificándoa como "un paradoxo ou un desaxuste". Ademais, o rexedor compostelano cualificou como a "expresión visual das listas do paro" a afluencia de xente a este tipo de iniciativas que, na súa edición do ano pasado, recolleu 3.500 solicitudes de emprego.

Tamén sinalou este feito o presidente da Área Empresarial do Polígono do Tambre, Jesús Chenel, quen afirmou que "antes o 80% das solicitudes de traballo se cubrían e, agora, invertéronse as porcentaxes".

FORMACIÓN E EXPERIENCIA

O posto que máis atención solicita dos asistentes é o que ten no pavillón a empresa 'Diconsa', dedicada ao ámbito da construción. Precisamente un sector que provocou o abandono dos estudios por parte de moitos mozos que se incorporaron ao mercado laboral sen preparación e que, hoxe en día, son os que máis difícil teñen volver ao mercado laboral.

"A xente estase a preparar cada vez máis a través de cursos de formación", afirmou a responsable desta empresa na feira. Neste sentido, os sindicatos CC.OO. e UGT, ambas as dúas colaboradoras na organización do evento, tamén teñen o seu espazo en Sar, dende o que ofrecen os que o desexen orientación e información sobre cursos de formación.

As responsables de UGT comentaron que os ciclos máis solicitados son os de dependencia, aínda que mostran a súa "inquietude" ante os recortes anunciados polo goberno neste ámbito.

REINVENTARSE COMO TRABALLADOR

A Universidade de Santiago de Compostela (USC) tamén está presente nesta feira para "orientar e ofrecer posibilidades titulados recentemente ou persoas que, tras anos de actividade profesional, se atopan sen traballo". A responsable deste posto sinalou a importancia da "flexibilidade" do traballador, tanto no ámbito da mobilidade como de "reinventarse nas súas capacidades e estar aberto a novas posibilidades profesionais".

"A idade na que deixas de valer cada vez vai baixando máis", afirmou a responsable da USC, quen sinalou que "agora con 30 ou 40 e poucos anos xa non dás o perfil nunha empresa", polo que fixo fincapé en "abrir o abano de posibilidades para traballar" e non se centrar en solo un sector ou profesión.

CANALIZADORES DE OFERTAS

A Asociación de Hostalaría de Santiago de Compostela e a Confederación Galega de Persoas con Discapacidade (Cogami) acoden a esta feira como "canalizadoras das ofertas de traballo" nos sectores nos que operan, servindo de enlace entre solicitantes de emprego e empresas.

Os hostaleiros sinalaron que o traballo de camareiro é o posto máis ofertado pero que menos cobren os empresarios, debido ao "sacrificado que é o desempeño da tarefa", o que provoca "pouca mantenencia" no posto.

Pola súa banda, Cogami confirmou o aumento de solicitantes dun posto de traballo na súa base de datos dende o estalido da crise por parte de persoas minusválidas. Ademais, sinalaron que "aínda existen prexuízos" á hora de contratar estas persoas.

Uns recelos que cualificaron de "infundados", ao basearse na crenza da "baixa cualificación" destes traballadores ou que van pedir baixas constantemente", algo que, para Cogami, non ten sentido xa que "está demostrado que estas persoas son máis responsables que outras".