A APDR solicita entrevistarse con Rosa Aguilar para falar de Ence

A Asociación Pola Defensa da Ría (APDR) solicitou unha entrevista coa ministra de Medio Ambiente, Medio Rural e Mariño (MARM), Rosa Aguilar, para falar sobre a situación ambiental da comarca e a "problemática" do complexo Ence--Elnosa en Lourizán (Pontevedra). A APDR trasladoulle á titular do MARM a preocupación que causaron "no seo da comarca e na poboación pontevedresa", as súas declaracións nas que "deixaba entrever a posibilidade de prorrogar a concesión de Ence máis aló do 2018". A APDR sinalou que "a única solución" ó problema da Ría e ó "incumprimento da lei por parte da empresa desde hai máis de 50 anos" é "o fin inmediato e definitivo da actividade do complexo no seu actual emprazamento".