Alegacións para frear a "privatización" da auga

Carme Freire, voceira da Plataforma contra a Lei de augas, onte, entregando as alegacións na Xunta FOTO: AXENCIAS

"A Lei de Augas ten que existir para regular a sobreexplotación das augas, pero non para privatizar un ben que debe de ser público, social e gratuíto". Así llo advertía onte a GH a secretaria xeral do Sindicato Labrego Galego (SLG), Carme Freire, quen, en calidade de voceira de toda a Plataforma Galega contra a Lei de Augas e acompañada por outros membros do colectivo, presentou na Consellería de Medio Ambiente, Territorio e Infraestruturas unha "alegación única" contra a citada normativa aprobada en solitario polo PP o ano pasado. A alegación busca como obxectivo último que se derrogue a polémica Lei e se abra un periodo de debate con toda a cidadanía con total transparencia onde se determine cal é o mecanismo mellor a escoller para cumprir os obxectivos comunitarios.

Despois da manifestación do 20 de marzo, que congregou a ó redor de 2.000 persoas na compostelá praza do Obradoiro en contra da privatización da auga, a Plataforma dá un paso máis coa presentación da alegación ós estatutos de Augas de Galicia. Freire denunciou onte unha vez máis que o texto que pretenden que rexa o funcionamento do ente "deixa ben clara a privatización e a mercantilización que vimos denunciando e que nos parece gravísima". Explicou que o artigo 23 permite a Augas de Galicia "a creación e constitución de sociedades mercantís e a participación en calquera outra sociedade constituída por entes públicos ou particulares" o cal significa "que se poderá facer negocio con algo que é innegociable: a auga, que debe ser un ben público, social e gratuíto para cubrir as necesidades básicas de calquera pobo". Para Freire, "non podemos consentir que vaiamos pagar por un ben e dereito básico como a auga, indispensable para vivir, para beber, para a nosa hixiene, e para a produción de alimentos".

O goberno autonómico nega as acusacións

A Xunta contesta que a nova Lei de augas "garante de xeito irrenunciable" a xestión pública deste recurso natural. "Augas de Galicia non será unha sociedade anónima nin terá capital no que poida incorporar unha parte privada. Todas as administracións poden crear sociedades mercantís sen que iso signifique que se privatizaron eses servizos", din.