APdR recorrerá a luz verde á planta de biomasa para ENCE

A planta de biomasa que a Xunta lle concedeu a ENCE-Pontevedra segue envolta na polémica. Despois de que o PSdeG anunciase esta semana a presentación dun recurso contra esta autorización, o responsable do PP en Pontevedra, Telmo Martín, decidiuse sumarse á iniciativa e tamén recurrir. De feito, o propio presidente da Xunta, Alberto Núñez Feijóo, defendeu onte a acción de Martín, asegurando onte que se el fose líder popular na provincia do Lérez tamén o faría, tras recordar que existe un "compromiso", que a Xunta "mantén", de que non se poden establecer plantas de biomasa en terreos sometidos á caducidade dunha concesión administrativa que acaba en 2018.

A esta oposición sumouse onte a cidadá, co anuncio dende a Asociación para a Defensa da Ría de Pontevedra (APdR) de presentar un novo recurso. Dende a asociación que lidera Masa aseguran que o grupo ENCE non dispón dos terreos propostos para instalar unha central de biomasa, xa que só dispón de concesión en predios de titularidade pública para a fábrica de pasta de papel, e recordan que a fin da concesión en 2018 pon en dúbida a viabilidade económica do proxecto. Tras expresar a súa estrañeza pola admisión a trámite da Xunta de Galicia, a APdR presentará recurso contra esa decisión, que temen que sexa un intento de prorrogar a súa ocupación na ría de Pontevedra, como antes xa fixeron co decreto de supramunicipalidade para a instalación dunha papeleira nos terreos de Lourizán.