As accións de Inditex marcan un novo máximo en 78 euros e revalorízanse un 23% no que vai de ano

Inditex marcou un novo máximo histórico en bolsa ao pechar a sesión cunha suba do 3,13%, superior ao rebote do 2,67% rexistrado polo Ibex, e coa cotización a 78 euros, o que supón unha revalorización do 23% no que vai de ano.

O xigante da moda, que onte anunciou a compra do edificio que alberga a tenda insignia de Zara en Londres por 192,39 millóns de euros, chegou a alcanzar os 78,3 euros durante a xornada.

A primeira compañía do selectivo por capitalización bolsista disparou o seu valor tras a presentación dos seus resultados trimestrais a semana pasada, que superaron as previsións dos analistas.

Entre o 1 de febreiro e o 30 de abril, o xigante da moda rexistrou un beneficio neto de 432 millóns de euros, o que supón un aumento do 30% respecto ao mesmo período do exercicio anterior, e unha cifra de negocio de 3.416 millóns de euros, un 15% máis.