Hemeroteca web | RSS  RSS     Venres 16.08.2019 Actualizado 13:34
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

O Atlantic Fest xerou un impacto económico de 1,7 millóns de euros na comarca de Arousa

VILAGARCÍA. EP  | 07.08.2019 
A- A+

O Atlantic Fest, celebrado na Illa de Arousa entre o 26 e 28 de xullo, xerou un impacto económico de 1,7 millóns de euros na comarca. Así se desprende dun estudo realizado pola Universidade de Santiago a partir de 1.393 enquisas realizadas in situ.

O informe calculou o retorno en 3,6 euros por cada euro investido polos seus organizadores. No caso da subvención achegada pola Axencia Galega das Industrias Culturais (Agadic), este situouse entre os 32 e os 37 euros por cada un dos preto de 27.000 euros adxudicados polo organismo autonómico ao Atlantic Fest.

Durante a presentación do documento, o director de Agadic, Jacobo Sutil, indicou que estes datos "reafirman a idea" de que os festivais son elementos "fundamentais non só na súa vertente cultural, senón tamén en canto a desenvolvemento económico e de turismo".

É por iso que Agadic iniciou a realización destes estudos socioeconómicos dos festivais patrocinados pola Xunta baixo a marca Fest Galicia, co obxectivo de promover a comunidade como destino musical "baixo criterios de calidade, sustentabilidade e responsabilidade social".

BOA PUNTUACIÓN
Os resultados do estudo revelan que foron máis de 9.000 as visitas que recibiu o Atlantic Fest durante o tres días da súa celebración, das cales 5.300 foron persoas diferentes.

Así mesmo tamén se recolle que un 18% dos asistentes procedían de fóra de Galicia e que o gasto medio por persona e día foi de 80 euros, sen incluír transporte. A valoración da cuarta edición do Atlantic Fest por parte do público asistente foi de 7,6 sobre 10.

Alcanzaron notas por encima do oito puntos cuestiones como a localización e integración na contorna, o trato do persoal, a sensación de seguridade ou o sistema de compra de entradas.

Estas elevadas puntuacións esténdense tamén a cuestións como que permite coñecer novos grupos de música (8,80), ver en directo propostas musicais de calidade (8,83), xera un ambiente positivo (8,48), mellora o coñecemento da localidade (8,87) e a súa imaxe (8,33), xera impacto económico (8,77), atrae turismo (8,38) e favorece o orgullo local (8,16).

Os apartados que obtiveron peor cualificación foron o transporte, os baños e a oferta gastronómica.

FACER MARCA
A codirectora do Atlantic Fest agradeceu o traballo realizado polo equipo da Universidade de Santiago que se sumará á enquisa postfestival que eles mesmos realizarán nos próximos días.

"O conxunto dos datos vainos a resultar de gran utilidade para valorar o volume de negocio que xera este festival", comentou.

Susana Laya sinalou que "o éxito desta edición", na que se esgotaron as entradas, está no traballo realizado durante todo o ano, con actividades como o Atlantic Emprende Gaiás ou os concertos realizados en varias cidades de Galicia nos Atlantic Days.

"O que buscamos é que a marca estea viva o resto do ano xa que iso vai ser determinante á hora de traerche até A Illa nun momento determinado, cando se celebre o Atlantic Fest", sinalou.

O informe do Atlantic Fest enmárcase na segunda quenda de estudos de impacto ao amparo de Fest Galicia, que en 2018 recolleu datos do Sinsal, PortAmérica, Revenidas, Sorrías Baixas e Resurrection.

Este verán súmanse tamén, ademais do Atlantic, o Vive Nigrán, 17º Ribeira Sacra, Festival da Luz, WOS Festival e Caudal Fest.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS