A Audiencia Nacional desestima a querela contra o exdirector xeral de Caixa Galicia e os seus fillos

O xuíz da Audiencia Nacional Ismael Moreno desestimou a querela presentada por un particular contra o que foi director xeral de Caixa Galicia durante case 30 anos, José Luis Méndez, e dous dos seus fillos, José Luis e Yago Méndez Pascual, segundo sinalou a Europa Press o propio denunciante, José Carlos Piñeiro González.

A querela, que atribuía a Méndez e os seus dous fillos delitos societarios, apropiación indebida e administración desleal e fraudulenta, tamén se dirixía contra Julio Fernández Gayoso e José Luis Pego, directivos de Caixanova que son investigados xunto a outros tres responsables da entidade noutro procedemento instruído polo xuíz Moreno a instancias da Fiscalía anticorrupción.

Piñeiro González explicou que recibiu o pasado luns un auto do Xulgado de Instrución número dous da Audiencia Nacional no que, segundo as súas palabras, o maxistrado sinala que "hai unha mala xestión pero non delito". Así, explicou que a Fiscalía, á que o xuíz Ismael Moreno remitiu esta querela o pasado 26 de xuño, interpreta que se produciu unha "mala xestión" en Caixa Galicia, pero "non chega á órbita penal".

"Hai un auto da Audiencia Nacional que me enviaron onte ou antes de onte, no que di que non poden continuar coa tramitación da nosa denuncia e unila ao proceso porque cren que non hai delito", sinalou.

Piñeiro González avanzou que nos próximos días, posiblemente este xoves, presentará un recurso de reforma ante o xuíz subsidiario de apelación ante a Sala do Penal, ao tempo que anunciou que membros do Sindicato Unificado da Garda Civil --ao que está vinculado-- comezarán a rexistrar nos próximos días medio centenar de querelas e denuncias contra a xestión de responsables de todas as caixas de aforros.

PROCEDEMENTO CONTRA NOVACAIXAGALICIA

En todo caso, o pasado 26 de xuño o xuíz Ismael Moreno admitiu a trámite unha querela presentada pola Fiscalía anticorrupción contra cinco exdirectivos de Novacaixagalicia polas cantidades adxudicadas en concepto de prexubilacions.

Moreno cre que os feitos aos que se refire a querela "revisten 'prima facie', e sen prexuízo de ulterior tipificación, carácteres de delito, polo que procede a súa admisión a trámite, así como a práctica das dilixencias de investigación que correspondan".
A Audiencia Nacional asumiu así a competencia para investigar por supostos delitos de administración desleal ou de apropiación indebida a José Luis Pego, Gregorio Gorriarán, Óscar Rodríguez e Javier García de Paredes e Julio Fernández Gayoso, que en aquel momento mantiña o seu cargo como copresidente e presentou a súa dimisión dúas días despois.