O aumento do custo da auga será do 282% en 22 municipios galegos

O PSdeG acusou este luns o presidente da Xunta, Alberto Núñez Feijóo, de ser o "único responsable" de que a auga vaia custar en Galicia un 120 por cento máis que en Andalucía, e denunciou que o aumento do custo será do 282 por cento en 22 municipios galego.

En rolda de prensa, os socialistas replicaron deste modo ao conselleiro de Medio, Agustín Hernández, que xustificou o canon polas "imposicións da Unión Europea".

A deputada socialista Carmen Gallego e o secretario de Medio da Comisión Executiva Provincial do PSdeG-PSOE, Nicolás González, denunciaron nunha comparecencia en Pontevedra que "os galegos van pagar a auga de media un 120% máis cara que os andaluces".

Ademais, os deputados socialistas alertaron de que o aumento do custo da auga será do 282 por cento en 22 municipios da Comunidade galega.

Na provincia de Pontevedra son once os municipios afectados --Moraña, Baiona, Soutomaior, Nigrán, Vilaboa, Gondomar, Tomiño, Tui, Illa de Arousa, Cambados e a capital Pontevedra--, que aplicarán, segundo sinala o PSdeG, aos seus cidadáns unha suba do 282 por cento no próximo recibo debido a que van pagar o canon da auga e o coeficiente de vertedura.

COEFICIENTE DE VERTEDURA

Ademais do citado canon de auga, aplícase o chamado coeficiente de vertedura, posto que estes municipios teñen a súa depuradora xestionada pola Xunta de Galicia.

O novo canon da auga que entrou en vigor este mes, ten para os socialistas unha finalidade "recaudatoria", porque obrigará a pagar as comunidades veciñais polas traídas privadas sen recibir ningún servizo a cambio. "E chega nun momento de recesión co desemprego crecendo en Galicia por enriba do Estado", dixo Carmen Gallego.

O PSdeG presentará mocións contra este canon en todos as institucións nas que teñan representación, "ademais seguiremos traballando para desmontar todas as mentiras do Partido Popular", concluíu Carmen Gallego.