Hemeroteca web | RSS  RSS     Domingo 26.04.2020 Actualizado 00:00
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

BNG ,ERC, Junts, Bildu e CUP esixen romper coa Monarquía

Avisan de que "só así" se poderá dar canle a solucións

MADRID/SANTIAGO. EP  | 03.02.2020 
A- A+

Os independentistas de Esquerra Republicana (ERC), Junts, EH Bildu, a CUP e o Bloque Nacionalista Galego (BNG) esixiron este luns romper coa Monarquía española e avisaron de que "só así se poderá dar canle a solucións baseadas no respecto á vontade popular, a liberdade e a democracia".

Así o plasmaron estes partidos nun manifesto que leron catalán, galego e eúscaro a sala de prensa do Congreso unha hora antes de que dea inicio a Apertura Solemne da XIV Lexislatura, un acto ao que decidiron non asistir porque estará presidido por un Rei que, segundo din, "non lles representa".

"NON NOS REPRESENTA"
"A Monarquía Española e o seu máximo expoñente, o Rei de España, non nos representa", comeza o manifesto que comezou lendo, en castelán, o portavoz parlamentario de ERC no Congreso, Gabriel Rufián, e que continuaron os seus homólogos de Junts, Laura Borrás; Bildu, Oskar Matute; CUP, Mireia Vehí; e BNG, Néstor Rego.

O documento sinala que a sociedade catalá, vasca e galega "rexeitan maioritariamente" a figura dunha institución "anacrónica, herdeira do franquismo", que se sustenta no obxectivo de "manter e impor" a unidade de España e as súas leis, "negando así os dereitos civís, políticos e nacionais" que asisten, sinalan, ás súas cidadanías e os seus pobos.

Os deputados asinantes, que cobran do Congreso entre 5.000 e 7.700 euros mensuais, apuntan que no camiño democrático cara á liberdade á que aspiran "o Rei non é un interlocutor válido" porque "nin ten a lexitimidade dos nosos pobos, nin lle recoñecemos ningunha función política".

"TENTA IMPOR VALORES ANTIDEMOCRÁTICOS"
"Menos aínda --engaden-- cando o seu papel para coas nosas nacións non foi outro que o de tentar impor proxectos e valores antidemocráticos, como quedou demostrado no discurso autoritario pronunciado o 3 de outubro".

ERC, Junts, Bildu, a CUP e BNG sinalan que a Monarquía é un estamento que "non responde os valores republicanos de liberdade, igualdade e democracia", polo que unha democracia real, na súa opinión, só será posible "desde a ruptura coa herdanza, as bases e valores que representa o Rei e a súa figura".

"Por iso, consideramos que o Rei e a Monarquía deben deixar de exercer a súa tutela sobre a cidadanía e sobre os gobernos e parlamentos que da vontade popular emanan --conclúen--. Só así se poderá dar canle a solucións baseadas no respecto á vontade popular, a liberdade e a democracia".

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS