Castellano e González-Bueno seguen á fronte de Novagalicia a pesar da rebaixa de soldos

O presidente executivo de Novagalicia Banco, José María Castellano, e o conselleiro delegado, César González Bueno, mantéñense á fronte da entidade a pesar de que as novas normas do Goberno suporán unha rebaixa de máis do 65% dos seus soldos.

O ministro de Economía, Luís de Guindos, anunciou o pasado venres que o soldo da cúpula de entidades que recibiron axudas públicas limitarase a 600.000 euros, que se rebaixan a 300.000 no caso das que foron nacionalizadas --caso de Novagalicia Banco, na que o FROB entrou controlando o 93% do capital--.

O presidente de Novagalicia Banco, José María Castellano, percibe 899.290 euros ao ano, mentres o conselleiro delegado, César González Bueno, recibe 891.180 euros anuais, segundo fixo público a finais de decembro de 2011, a requirimento do Goberno central, a entidade financeira.

Ademais, os conselleiros non executivos verán limitadas as súas retribucións a un máximo de 50.000 euros por todos os conceptos. Polo momento e á espera da publicación da orde ministerial que concrete estas medidas, ningún dos conselleiros de Novagalicia comunicou algunha decisión respecto de manterse no posto ou non, segundo explicou a entidade.