A CIG actuará contra o "pacto social" porque "vende os traballadores"

O secretario xeral da CIG, Suso Seixo, reiterou onte o "claro rexeitamento" do seu sindicato ás medidas incluídas no pacto social (entre elas a reforma das pensións) e anunciou que continuará convocando mobilizacións contra o documento, que debe seguir agora coa súa tramitación. O acordo é para Seixo "unha venda descarada dos intereses da clase traballadora" e está "cargado de cinismo e engano". Así, o responsable da organización sindical nacionalista criticou a actitude de CCOO e UGT, que forman parte do pacto, e acusounos de "entreguismo" ós intereses da "oligarquía financeira" española, os mesmos ós cales "favorecen" as políticas do Goberno central, dixo. Trátase, a xuízo da CIG, dun "pacto a favor da desmobilización" dos traballadores, co cal CCOO e UGT "renuncian" a promover protestas entre a cidadanía. "Por suposto, imos seguir coa contestación social", afirmou Seixo, que indicou que nos próximos días reuniranse os órganos directivos do sindicato para deseñar as protestas, que incluirán concentracións e manifestacións.

Ó preguntarlle sobre a posibilidade de convocar algún acto fóra de Galicia, sinalou que non se descarta" organizar algunha protesta en Madrid, "se hai cobertura doutros sindicatos nacionalistas" implantados noutras comunidades, aínda que insistiu en que non hai decisións tomadas. Seixo sinalou que, no pacto social, "véndese como un avance importante" que os traballadores con 38 anos e medio cotizados se poidan xubilar ós 65 anos. "Pero é que ata agora se podía facer con 35 anos cotizados; non sei onde está o avance", replicou e criticou que fose admitida "a proposta máxima" do Executivo central respecto da base para calcular a prestación, que pasará dos 15 últimos anos actuais a 25..