Colapsan Sanxenxo milleiros de afectados polas preferentes de Novagalicia Banco

Máis de tres mil persoas, convocadas por unha ducia de plataformas de afectados de toda Galicia, maniféstanse nesta mañá de sábado en Sanxenxo para reclamaren unha solución ao escándalo das participacións preferentes, principalmente colocadas aos seus clientes polas caixas, transformadas agora en Novagalicia Banco. A mobilización colapsou o centro do concello pontevedrés, capital de veraneo da 'jet' galega e de importantes líderes políticos do centrodereita. Os manifestantes -que lanzaron ovos e pegaron carteis nas fachadas de entidades bancarias- acusan por igual as financieras ás que confiaron os seus aforros e á Xunta, por promover a vía da arbitraxe, na que non cren e á que só acodiron até agora trece de cada cen afectados.