Hemeroteca web | RSS  RSS     Martes 11.12.2018 Actualizado 21:23
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Demandan a Audasa por "prácticas abusivas" no prezo das peaxes

Cobrou as tarifas íntegras pese ao deficiente servizo mentres duraron as obras de ampliación do vial na contorna da ponte de Rande

VIGO. EP  | 04.12.2018 
A- A+

A Fiscalía de Pontevedra presentou no xulgado do Mercantil desta cidade unha demanda de xuízo ordinario contra a concesionaria da AP-9, Audasa, en exercicio de acción colectiva de cesación en defensa dos consumidores e usuarios, polo que considera prácticas "abusivas" da empresa, que cobrou as peaxes íntegras pese ao deficiente servizo que estaba a prestar durante "polo menos tres anos", que duraron as obras de ampliación do vial na contorna da ponte de Rande.

O ministerio público lembra que, neste período, o tráfico na ponte viuse "permanentemente afectado", cos consecuentes prexuízos aos usuarios, que perderon tempo nos seus desprazamentos e víronse atrapados en colapsos en numerosas ocasións. "Todos os usuarios víronse afectados, en canto recibiron un servizo da autoestrada con insuficientes condicións de fluidez e seguridade", apostilou o Fiscal.

Así, entende que a concesionaria cobrou unhas peaxes por uns servizos deficientes e ve "abusiva" a práctica de cobrar a taxa íntegra, a mesma que se a autoestrada tivese unhas condicións normais de circulación.

Por iso, reclama que se dite sentenza na que se declare a nulidade dese cobro e se inste a Audasa a cesar en dita práctica en diante, "en calquera autoestrada que xestione en España", elaborando un criterio de eliminación do prezo da peaxe nos casos de insuficiente fluidez do tráfico.

Por outra banda, a Fiscalía tamén solicita que se condene á empresa a reintegrar eses importes (os que foron cobrados entre o 27 de febreiro de 2015 e o 1 de xuño de 2018) aos usuarios que acrediten ser afectados; e que se indemnice polo dobre do importe da peaxe a "tódolos usuarios, condutores ou pasaxeiros", que acrediten atoparse nalgún dos atascos que implicaron retencións de máis de 10 minutos.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS