Hemeroteca web | RSS  RSS     Domingo 26.04.2020 Actualizado 00:00
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Detido un home de 26 anos en Vigo por estafar máis de 100.000 euros coa venda online de máscaras

VIGO. EP
A- A+

A Guadia Civil detivo a un home de 26 anos en Vigo por dedicarse a estafar máis de 100.000 euros a través da venda online de máscaras polo territorio nacional e internacional.

A este home acúsaselle dun delito de estafa continuada, co agravante de tratarse de bens de primeira necesidade durante o estado de alarma. Ademais conta con antecedentes policiais por delitos de falsidade e contra o patrimonio.

Esta vez foi detido por mor dunha denuncia interposta por unha residencia de maiores de Burgos que a través dunha páxina web comprara material de protección sanitario por un valor de máis de 3.500 euros.

A suposta empresa vendía produtos de "protección específica contra o contaxio do coronavirus", pero ao non recibir o material denunciaron á presunta compañía e comprobouse que constaban máis de 60 denuncias contra este sitio web, que non permitía o reembolso de pago.

A Garda Civil iniciou unha investigación que levou aos axentes até Vigo, onde comprobaron que a empresa que operaba con ese portal web tratábase en realidade dun "complexo armazón virtual", segundo explicou este corpo de seguridade do Estado nun comunicado este sábado.

No mesmo precisaron que "o engano se cometía a través dunha tenda online perfectamente deseñada onde se informaba permanentemente da existencia de 'stock' de material sanitario e posibilitaba o pago seguro mediante un amplo abanico de sistemas". Para "reforzar" o engano, marcaba prazos de entrega moi breves (España peninsular 15 días, Illas 18 días, UE de 7 a 15 días).

Unha vez transcorría este período, os clientes non recibían as máscaras FFP3 que encargaran e se chegaban era en pouca cantidade, de pésima calidade e sen as certificacións correspondentes.

Tras descubrirse a estafa, a Garda Civil puido comprobar que o home ao que acusan recibía os pagos dos clientes estafados en sete contas bancarias. Nelas constaban máis de 2.600 transaccións por máis de 100.000 e o sistema de pago online rexistrara máis de 753 reclamacións.

Así, os axentes procederon á súa detención na cidade olívica e as dilixencias contra el foron entregadas no Xulgado de Instrución de Salas de los Infantes (Burgos).

TRATA DE FUXIR
Por outra banda, a Garda Civil tamén interceptou a un home de 27 anos que circulaba pola N-120 (Ourense-Vigo), tratou de fuxir, non tiña carné de conducir e incumpría a orde de confinamento vixente polo estado de alarma.

Os feitos remóntanse ao pasado martes, cando dous motoristas da Garda Civil circulaban á altura do quilómetro 572 da N-120 sentido Vigo. Alí viron como un coche aceleraba coa intención de fuxir dos axentes, polo que os efectivos foron após el.

Cando o interceptaron o condutor resultou ser un home de 27 anos, veciño de Ourense, que nunca obtivera a autorización administrativa para conducir, polo que o acusaron dun delito contra a seguridade do tráfico.

Ademais, o vehículo carecía de ITV e de Seguro desde facía un ano, unhas infraccións que carrexan sancións de 200 e 1500 euros respectivamente. Tamén foi denunciado por non respectar a distancia de seguridade con outros usuarios da vía, unha infracción grave que supón unha sanción de 200 euros e detracción de 4 puntos.

Igualmente, o condutor non puido justificar o motivo do seu desprazamento, o cal se contempla como unha infracción á Lei de Seguridade Cidadá no actual estado de crise sanitaria.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS