Eduardo Pardo de Guevara, novo coordinador institucional do CSIC en Galicia

Eduardo Pardo de Guevara y Valdés

O presidente da Axencia Estatal Consello Superior de Investigacións Científicas (CSIC) nomeou a Eduardo Pardo de Guevara y Valdés, profesor de investigación e director do Instituto de Estudios Galegos Padre Sarmiento, coordinador institucional do CSIC en Galicia, en substitución de Uxío Labarta, quen desempeñaba o cargo dende o 17 de maio de 2006.

Eduardo Pardo de Guevara e Valdés é natural de Ponteceso (A Coruña) e está afincado en Lugo. É doutor en Historia Medieval pola Universidade Complutense de Madrid (UCM), onde exerceu a docencia durante varios anos na cátedra de Paleografía e Diplomática.

En 1988 ingresou por oposición na escala de Científicos Titulares do CSIC. Exerceu como científico titular na Institución Milá i Fontanals de Barcelona (1988-1990) e no Instituto de Historia de Madrid (1990-1994).

Dende 1994 exerce de director do Instituto de Estudios Galegos Padre Sarmiento, centro adscrito á Área de Humanidades e Ciencias Sociais do CSIC con sede en Santiago de Compostela, e que dende o ano 2000 é un centro mixto do CSIC e a Xunta. En 2008 Eduardo Pardo de Guevara e Valdés alcanzou o máximo grao da carreira investigadora en España: profesor de investigación do CSIC.

As súas liñas de investigación céntranse no ámbito da Historia da Idade Media, particularmente entre os séculos XIII e XV, e de xeito máis específico na historia social do poder, a Xenealoxía e a Heráldica medieval.