O emprego irá a peor este ano

O presidente do Goberno, Mariano Rajoy, asegurou que as cifras de emprego, "por desgraza", non van mellorar no curto prazo, senón que empeorarán no ano 2012, polo que a intención do Goberno é expor unha reforma laboral "ampla, profunda e equilibrada".

Así o sinalou Rajoy durante a súa comparecencia no Congreso para explicar os resultados do último cume europeo, onde dixo que a reforma, que se aprobará este venres, ten que ser "útil" para a consecución dun clima que favoreza a competitividade, a contratación e o emprego estable.

O xefe do Executivo, que repasou as medidas emprendidas polo Goberno e os acordos do Cume, destacou a necesidade de aplicar unha política "global" porque a consolidación fiscal por si soa non serve para relanzar a economía e crear emprego. "É condición necesaria, pero non suficiente", dixo.

Ademais, asegurou que os Xefes de Estado e de Goberno da área euro deron a benvida ás medidas aplicadas por España en consolidación fiscal e mellora da competitividade e pediron que se seguise polo mesmo camiño.