Entrega este domingo dos restos de tres asasinados pola represión franquista en Boimorto

A Asociación para a Recuperación da Memoria Histórica (ARMH) entregará os restos de tres asasinados pola represión franquista ás súas familias nun acto que se celebrará no Concello de Boimorto (A Coruña) ás 12.30 horas.

En concreto, os restos corresponden a Isidro Filloy López, de 46 anos; Andrés Filloy, de 18; e a Caitán García Vázquez, de 42 anos. Todos eles asasinados por un grupo de falanxistas o 20 de agosto de 1936 e exhumados en setembro de 2007, explicou a ARMH nunha nota de prensa.

Segundo recordou, no verán de 2007, a Asociación para a Recuperación da Memoria Histórica levou a cabo a exhumación destes tres veciños asasinados coa colaboración de numerosos cidadáns e familiares das vítimas, así como do Concello de Boimorto.

Os traballos de exhumación foron dirixidos por Andrés Crespo co apoio de varios voluntarios chegados de diversas partes de España. Unha vez exhumados, os restos foron trasladados ao País Vasco, onde foron estudados por forenses, detallou a ARMH.

Deste modo, o pasado mes de abril as probas xenéticas que levaron a cabo deron resultados positivos de modo que as identidades dos tres corpos corresponden cos dos veciños reclamados polos seus familiares.

"UN TOTAL DE 11 VECIÑOS"

A Asociación para a Recuperación da Memoria Histórica indicou que o número total de veciños de Boimorto asasinados en agosto de 1936 ascende a 11, seis no cemiterio de Ortoño, en Ames, e cinco en dúas foxas comúns en O Amenal, O Pino.

Por iso, a Agrupación de Familiares das Vítimas do 36 de Boimorto prevé retomar os traballos para identificar os falecidos en canto sexan conseguidos os permisos de accesos a un terreo no que, posiblemente, se atopa unha foxa común en que atoparán atoparan os restos de Ramón Sánchez Rapela, de 34 anos e Ramón Vázquez Garea, de 50.