ETA anuncia o "cesamento definitivo" da actividade armada

A organización terrorista ETA anunciou hoxe que "decidiu o cesamento definitivo da súa actividade  armada", segundo un comunicado difundido na edición dixital do  diario Gara. Nesta declaración, que cualifica como "histórica", ETA expuxo o seu "compromiso claro, firme e definitivo" de "superar a  confrontación armada". Con ese obxectivo, fai un chamamento aos gobernos de España  e Francia para abrir un proceso de diálogo directo" destinado a solucionar  "as consecuencias do conflito".

ADAMS PIDE CONVERSAS 

O presidente do Sinn Fein, Gerry Adams,  celebrou o "decisivo" comunicado emitido hoxe pola banda terrorista  ETA, no que anuncia "o cesamento definitivo da súa actividade armada",  e instou os Gobernos español e francés a iniciar conversacións  que aborden "exclusivamente as consecuencias do conflito".
"Celebro os decisivos e positivos termos na resposta de ETA  á declaración do pasado luns en San Sebastián", dixo o  dirixente republicano nun comunicado en referencia á  conferencia sobre o fin do terrorismo celebrada nesa localidade  vasca.
"Despois das nosas deliberacións, o Grupo Internacional  expresou a opinión de que 'é posible pór fin á última  confrontación armada de Europa", sinalou o presidente do Sinn Fein,  antigo brazo político do inactivo Exército Republicano Irlandés  (IRA).
"Pedímoslle a ETA -lembrou Adams- que fixese unha declaración  pública sobre o fin definitivo de todas as accións armadas e que  pedise falar cos Gobernos de España e Francia para abordar  exclusivamente as consecuencias do conflito".
Na súa opinión, o comunicado de ETA cumpre con aqueles  "requisitos", polo que instou aos citados gobernos a "celebrar"  o paso dado pola banda armada.
Desde a súa experiencia no proceso de paz en Irlanda, Adams  adiantou que "os seguintes pasos" deben centrarse en "promover a  reconciliación, abordar a cuestión das vítimas e recoñecer que se efectuaron serios esforzos para pechar feridas persoais e  sociais".
Neste sentido explicou que hai "outros asuntos" que tamén deben  de ser tratados e que servirían para "construír confianza dentro do  proceso".
"Por exemplo -dixo-, entre estes está o asunto dos presos e  o da desmilitarización da contorna e o do respecto e  recoñecemento dos dereitos democráticos de todos os partidos  políticos, que deben ser tratado como iguais".
Por este motivo, Adams lembrou que Batasuna aínda está  "ilegalizada e que líderes como Arnaldo Otegi, quen está totalmente  comprometido, na miña opinión, coa paz, están presos".