Hemeroteca web | RSS  RSS     Xoves 17.10.2019 Actualizado 14:56
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Feijóo ofrece "colaboración mutua" entre Galicia e Arxentina en ordenación e control pesqueiro

O presidente da Xunta visita as plantas de Estrella Patagónica e Iberconsa de Arxentina en Rawson e reúnese co gobernador da provincia

O presidente da Xunta, Alberto Núñez Feijóo, visita as instalacións de Iberconsa en Rawson (Arxentina) - FOTO: Xunta
O presidente da Xunta, Alberto Núñez Feijóo, visita as instalacións de Iberconsa en Rawson (Arxentina) - FOTO: Xunta

SANTIAGO. EP  | 17.09.2019 
A- A+

O presidente da Xunta, Alberto Núñez Feijóo, ofreceu "colaboración mutua" entre Galicia e Arxentina para avanzar en ordenación e control pesqueiro, ademais de en materias como investigación, control e capacitación das tripulacións e en loxística portuaria.

O titular do Goberno galego visitou este luns as instalacións das pesqueiras Estrella Patagónica e Iberconsa na cidade arxentina de Rawson, onde tamén se reuniu co gobernador da provincia de Chubut, Mariano Arcioni.

Feijóo avanzou varias reunións con responsables de pesca de Santa Cruz e Buenos Aires co obxectivo de "avaliar cos gobernos provinciais e co Goberno arxentino as circunstancias e a actividade das empresas galegas" neste país, tal e como informa a Xunta.

"Ofrecemos colaboración naquelas cuestións onde ambas as partes podemos aprender e sacar partido", dixo, á vez que explicou que sería "polo ben" das industrias pesqueiras galegas no país latinoamericano, polos seus traballadores e por un sector básico para a Comunidade.

"Imos tentar pornos a disposición, agradecer o tratamento que teñen coas empresas galegas e tamén expor distintas posibilidades e colaboracións en materia de formación, en materia de experiencia e de ordenación pesqueira", resumiu Feijóo.

"UNHA MELLOR EXPLOTACIÓN DOS RECURSOS"
Neste sentido, expresou o interese da Xunta por estudar "como facer unha mellor explotación dos recursos" tendo en conta a "ameaza" para a sustentabilidade que supón a frota chinesa, que faena fóra das 200 millas. Ademais, apostou por "ter en conta o estado de recursos como o lagostino, que creceu moito nos últimos anos".

Para iso, Feijóo apostou por crear unha Organización Rexional de Pesca por mor da colaboración entre os países da zona do Atlántico sueste para "ordenar e xestionar correctamente" as pesqueiras.

Así mesmo, subliñou o obxectivo de avaliar e verificar que as empresas galegas "manteñen a súa estabilidade" e que a situación económica de Arxentina "lles afecte o menos posible".

"Para iso, trataremos coas autoridades temas de interese para a viabilidade das nosas empresas e para a pesca de Galicia, relacionados co avance da operatividade nos portos de Porto Madryn e Porto Desexado, coa posibilidade de conseguir acordos vantaxosos á hora de realizar investimentos como a renovación da frota e coas condicións de exportación, especialmente no que ten que ver co acordo entre a Unión Europea e Mercosur", abordou.

EMPREGO DE CALIDADE, ALGO "FUNDAMENTAL"
No plano do social, aseverou que a Xunta "sempre" defenderá que a creación de emprego de calidade debe ser unha cuestión "fundamental" alá onde estean as compañías galegas. "Aínda que sabemos que así o fan", continuou.

Así as cousas Feijóo valorou o "permanente e total" do seu Goberno polas empresas que operan no estranxeiro. "E, neste caso, Galicia é un dos principais investidores nesta materia en Arxentina", asegurou.

E é que, tal e como explicou, Arxentina, xunto con Namibia, é o principal estado no que a pesca galega desenvolve a súa actividade mediante empresas mixtas. No país latinoamericano, teñen 68 buques en propiedade e operan outros 14 en exclusiva que, en total, xeran case 5.000 empregos --2.000 a bordo dos barcos de pesca--.

Así mesmo, a Xunta destaca que as compañías galegas "son as responsables da maior parte das exportacións pesqueiras" de Arxentina a Galicia, cunha media de 55.000 toneladas de peixes e mariscos e cun montante anual medio de 250 millóns de euros.

"En definitiva, estamos na Patagonia, acreditando en primeiro lugar que somos un pobo pescador, que crea postos de traballo en Arxentina e que nos interesa a pesca sustentable, a ordenación dos recursos pesqueiros e tamén a mellora dos portos onde faenan as nosas frotas galegas", sentenciou.

 

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS