Hemeroteca web | RSS  RSS     Venres 06.12.2019 Actualizado 13:32
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Feijóo reivindica a "estabilidade política" de Galicia "faga o que faga o señor Sánchez"

Censura que o "obxectivo existencial" do presidente do Executivo en funcións é "estar no Goberno, pero non gobernar"

SANTIAGO. EP  | 19.07.2019 
A- A+

O presidente da Xunta, Alberto Núñez Feijóo, reivindicou este xoves que en Galicia a "estabilidade política estará garantida, faga o que faga o señor (Pedro) Sánchez e fagan o que fagan outros políticos".

Así respondeu na rolda de prensa posterior á reunión semanal do seu Executivo, onde foi preguntado sobre se unha repetición dos comicios xerais podería alterar o calendario electoral galego, coa próxima cita coas urnas prevista para o outono do 2020.

"Se a algo me comprometín durante o tempo que levo de presidente é dar estabilidade á miña terra, e esa estabilidade estará garantida, faga o que faga o señor Sánchez e fagan o que fagan outros políticos. En Galicia hai un goberno que goberna", sentenciou.

Ademais, aproveitou a ocasión para criticar que o obxectivo "existencial" e "fundamental" do presidente do Executivo central en funcións, Pedro Sánchez, é "estar no Goberno, pero non gobernar". E é que para Feijóo "varios meses" que leva en funcións o Goberno "empeza a ser un problema que sorprende a calquera dirixente político".

"AS CORTES NON FUNCIONAN"
Debido a esta situación, apunta o mandatario autonómico, "en España hai ministros que están no Goberno pero non gobernan" e "as Cortes non funcionan". "Non se admiten iniciativas, non se responde a ningunha sesión de control... O cal significa que é moi difícil de justificar o soldo de deputados e senadores", explicou.

"Non traballan porque o Goberno non lles deixe traballar", esgrimiu, á vez que apostou por "explicar" aos cidadáns por que teñen "un Goberno que non goberna, un presidente que quere estar e non gobernar, e unhas Cortes que están e non actúan".

Neste contexto, Feijóo dixo "non poder estar máis de acordo" co expresado este mércores polos expresidentes do Goberno José María Aznar e Felipe González: "Unha situación esperpéntica a que estamos a vivir neste momento. Ademais, os cidadáns non a merecemos".

 

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS