Hemeroteca web | RSS  RSS     Xoves 17.10.2019 Actualizado 14:56
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

A Fundación Amancio Ortega financiará con 90 millóns as 7 novas residencias de maiores proxectadas pola Xunta

A Fundación subscribe a maior "doazón" feita á Xunta até o momento e Feijóo reivindica o valor do seu mecenado

Pola esquerda, José Arnau, vicepresidente executivo da Fundación Amancio Ortega; Flora Pérez Marcote, vicepresidenta primeira; Alberto Núñez Feijóo, presidente da Xunta, e Fabiola García, conselleira de Política Social, no acto de sinatura do convenio - FOTO: XUNTA
Pola esquerda, José Arnau, vicepresidente executivo da Fundación Amancio Ortega; Flora Pérez Marcote, vicepresidenta primeira; Alberto Núñez Feijóo, presidente da Xunta, e Fabiola García, conselleira de Política Social, no acto de sinatura do convenio - FOTO: XUNTA

SANTIAGO. EP  | 14.09.2019 
A- A+

A Fundación Amancio Ortega (FAO) financiará con 90 millóns de euros a construción e equipamento das sete novas residencias de maiores proxectadas pola Xunta nas cidades galegas e que, en total, sumarán 900 novas prazas para a rede pública de Galicia. Ademais, permitirán crear máis de 800 empregos directos.

Así quedou subscrito este venres coa firma dun convenio de colaboración en Santiago de Compostela, nun acto no que participaron, entre outros, a vicepresidenta primeira da Fundación, Flora Pérez Marcote; o presidente da Xunta, Alberto Núñez Feijóo; e a conselleira de Política Social, Fabiola García.

Tras a firma do convenio, Feijóo agradeceu o mecenado da Fundación, que permite "descargar ás arcas públicas dun importante investimento, cuxa contía seguirá encadrada no ámbito social, pero poderá destinarse a outros fins".

Así, destacou que actos deste tipo evidencian que "o servizo público" está en "todas as capas" da sociedade galega. De feito, subliñou que, con esta "doazón" "desméntese esa minoría que afirma que as empresas non invisten no ámbito social para enrocarse no falso mito dun sector privado inhumano".

Lonxe diso, o presidente defendeu que "a chave do futuro está na colaboración leal entre o sector público e o sector privado". O Executivo autonómico remarca que este é o "maior proxecto singular da historia da entidade" e fontes da Fundación confirmaron a Europa Press que é a maior "doazón" realizada á Xunta de Galicia na historia da entidade.

Unha doazón formalizada, en palabras de Fabiola García, quen tamén resaltou a importancia do mecenado na loita, "a cambio de nada e a favor de todos os galegos".

900 PRAZAS E 800 EMPREGOS
A Xunta porá os terreos a disposición da entidade, que asumirá, cun orzamento inicial estimado de 90 millóns, os gastos de construción e o equipamento completo do sete novos centros de atención integral a persoas maiores. Finalizados, a chave dos centros farase chegar á Xunta, que sumará á súa rede 900 novas prazas residenciais.

Delas, 150 funcionarán en Vigo e outras tantas na Coruña; mentres as cidades de Ourense, Lugo, Santiago, Pontevedra e Ferrol contarán con 120 en cada caso. O seu funcionamento diario permitirá a creación de máis de 800 empregos directos no sector da atención aos maiores.

"VOCACIÓN ALTRUÍSTA"
Feijóo eloxiou o compromiso social da Fundación, que xa financiou a construción de seis escolas infantís públicas, dous centros intergeneracionales en Ourense e Arteixo, e a nova sede da Real Institución Benéfico-Social Padre Rubinos na Coruña. En clave estatal, a Fundación tamén doou máis de 300 millóns para renovar equipos oncolóxicos, entre outras actuacións.

A nova colaboración entre a FAO e a Xunta, insistiu Feijóo, supón "unha mostra da vocación altruísta que latexa no seo da sociedade galega, tanto no sector público como nas súas entidades privadas".

ESTUDO ELSA URQUIJO
O presidente apuntou que o sete futuras residencias ofrecerán unha atención asistencial con vocación de excelencia, que as levará a ser as mellores de Europa, nuns edificios deseñados polo estudo galego Elsa Urquijo Arquitectos.

"A atención ás persoas maiores de Galicia dá un paso máis na procura da excelencia e demostra que está preparada para abordar os retos da década de 2020", subliñou.

Pola súa banda, o vicepresidente executivo da Fundación, José Arnau, agradeceu en nome da institución a confianza depositada nela, e resaltou a importancia de colaborar co maior esforzo posible para mellorar a calidade de vida dos maiores.

A conselleira de Política Social ratificou que a Xunta manterá as súas liñas de traballo en defensa do impulso demográfico e de velar por mellorar a atención aos maiores. A modo de exemplo, lembrou que, nos últimos dez anos a comunidade incrementou un 42 por cento o número de prazas públicas para maiores, até chegar ás 8.000.

 

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS