Hemeroteca web
|
RSS
Luns 21.05.2012
| Actualizado 21.20
RSS
A Fundación Luis Seoane expón dende este martes, día 7, e ata o próximo 6 de maio na súa sede de A Coruña, a mostra "Camiño de Seoane. Fontes e recursos" na que se exhiben os óleos do artista e outra sobre 'Valentín Paz-Andrade. Galiza como tarefa' coincidindo coa homenaxe da que será obxecto o escritor e economista o Día das Letras Galegas.
Paralelamente a ambas as dúas mostras, que no caso da dedicada a Paz-Andrade se exporá tamén en Vigo a mediados de maio, a Fundación Luis Seoane proxectará un documental sobre Isaac Díaz Pardo, do que é autor Xosé Abad, con motivo do seu falecemento o pasado mes de xaneiro.
Á presentación de ambas as dúas mostras, asistiron o tenente de alcalde de Cultura do Concello de A Coruña, Ana Fernández; os comisarios das exposicións, Silvia Longueira, directora da Fundación Luis Seoane, e Xosé Díaz; o músico Xurxo Souto, en representación de Xosé Abad, e o director da Obra Social de Novacaixagalicia, Guillermo Brea, e José Peña, en representación da Fundación Repsol.
Sobre a mostra de Luis Seoane, Silvia Longueira indicou que se centra nos propios fondos da Fundación e en concreto nos óleos do artista realizados entre 1945 e 1958. A exposición inclúe, ademais, material documental diverso dende fotografías persoais e bosquexos de óleos ata correspondencia persoal, libros ou cadernos de viaxes.
Pola súa banda, Xosé Díaz indicou que a mostra de Valentín Paz-Andrade abrangue as súas distintas facetas como político, empresario "e home curioso de todas as culturas do mundo", engadiu en relación á colección de arte que posuía e da que se expoñen algunhas pezas.
Para iso, a exposición divídese en 25 seccións, ordenadas na súa maior parte cronoloxicamente, nas que o visitante atopará documentos orixinais, fotografías da época, mapas, debuxos, documentos audiovisuais e un percorrido sobre a biografía dun dos fundadores do Partido Galeguista e dos impulsores do Estatuto de Autonomía de Galicia.
