Gabinete de crise do lácteo para pedir o 'rescate' do sector

A Organización de Produtores de Leite (OPL), que representa a máis de 700 explotacións de vacún de leite de toda España que producen máis de 810 millóns de litros, organizou o seu "gabinete de crise" para reunirse o próximo 22 de agosto en León, co obxectivo de pedir o "rescate" do sector produtor de leite.

Segundo os responsables da organización, de manterse o prezo actual do leite en orixe en 0,29 euros o litro, "o leite español desaparece en menos dun ano".

Ante isto, a Organización estudará a posibilidade de sumarse ás mobilizacións que o próximo venres comezarán en Galicia para reivindicar un prezo "digno" para o leite.

Así mesmo, OPL denuncia que o sector "segue ameazado co abandono das recollidas de leite" e asegura recibir a denuncia dalgúns gandeiros que se viron "premidos" polas centrais leiteiras para aceptar prezos por debaixo dos de mercado ou ser abandonados sen recollida, "prácticas que se repiten sexa cual sexa a industria que recolle", aseguran.

É por iso que a organización celebra a investigación que está a realizar a Comisión Nacional da Competencia e espera que a mesma se amplíe ata a distribución.

VETERINARIO

Así mesmo, OPL solicitou ante o Goberno central e as comunidades autónomas que se obrigue ás centrais leiteiras a dispoñer dun veterinario oficial.

"A figura do veterinario no muelle da industria garantiría a calidade do leite, igual que no matadoiro esta figura garante a calidade da carne fresca, tal como recoñece o regulamento da Unión Europea (UE),", afirma a organización.