Galicia Bilingüe trasladará ao novo responsable de Política Lingüística supostas "irregularidades" da Xunta

A asociación Galicia Bilingüe solicitou unha audiencia ao novo secretario xeral de Política Lingüística, Valentín García, para trasladar as "irregularidades" e "incumprimentos" que, segundo esta asociación, se están a producir por parte de todas as consellerías da Xunta ao "non respectar o dereito dos cidadáns a ser atendidos e a recibir información en ambas as dúas linguas".

Segundo esta asociación pro libre elección de lingua, a Consellería de Educción "é a que incumpre de forma máis grave a lexislación", polo que acudirá a esa reunión "cunha batería de incumprimentos".

Ao respecto, asegura que hai "multitude de queixas de pais, principalmente con fillos no ensino público", e que se refiren a que "en numerosos colexios e institutos as materias troncais son impartidas só en galego como na época do bipartito".

Galicia Bilingüe asegura que algúns pais protestaron nos colexios, se ben a "inmensa maioría foi disuadida de plasmar a súa queixa por escrito".

Por iso, esta asociación anunciou que reclamará a ao secretario xeral de Política Lingüística que "inste á inspección educativa a que cumpra co seu labor para que non teñan que ser os pais os que se vexan obrigados a pasar por situacións incómodas".